Jer柳應廷獲封現今香港樂壇性格最好男歌手？！ 網民大讚有Eason影子！

1）玩得無偶包樂做「團欺」！性格謙虛唔亂講野

首先第一點版主就話Jer好玩得又無偶包，更係成員間做「團欺」（即係團裡大家，經常被調戲、欺負嘅對象）。加上份人夠謙虛同唔會亂講野，係MIRROR入面少有無失過言嘅成員。

2）唔做主流音樂大讚有Heart！堅持唱廣東歌為主

係2020年開始Jer從「物語系列」、「重生系列」到去年嘅「虐心系列」，推出一共10首互相連貫的個人單曲，可以算係近年比較罕有、精心設計嘅歌曲鋪排。版主提到10首歌曲無論曲風同題材都未必係主流市場嘅心水，但堅持唔做commercial音樂，大讚Jer對音樂有heart。另外又指Jer夠貼地，從當初參賽至今都愛唱廣東歌，相反其他成員唱國語歌比較多。

3）《造星4》指導小組淘汰 爆喊話唔公平！
前年播出嘅《全民造星IV》Jer就擔任25強導師之一，佢負責嘅小組最後被淘汰出局，知道消息後更忍唔住爆喊，Jer更當住花姐同其他成員面前表示「我覺得唔公平囉！」事後佢亦有出po鼓勵組員，希望之後繼續努力。

4）唔似其他人「惡行」黑面、睇大波妹

版主去到最後就話Jer唔似其他人黑面、感冒同睇大波妹，仲形容呢啲係「惡行」，亦無鬧過fans同haters。

網民慨嘆公司無資源捧Jer性格似足Eason！

不過最後呢兩點網民就似乎唔太認同，反而比較關心Jer其實係唱腔、曲風、台型甚至性格都係單飛最好，但偏偏就無落資源去捧，仲話佢出場帶動氣氛同大情大性方面，有歌神Eason嘅影子。

Jer樂做MIRROR「心靈雞湯」！唔介意做成員「樹窿」

而早前有鏡粉曾發現佢係活動上「撩」姜濤玩，希望對方可以放鬆心情，獲成員封為成員間嘅「心靈雞湯」。其後Jer受訪時亦透露做藝人壓力大會影響台上表演，倒不如輕鬆開心工作會更好。佢又自言係開心組組長，睇每件事都較樂觀，亦唔介意做成員嘅「樹窿」，有唔開心可以同佢傾訴！