First Love初戀Netflix｜林日曦怒插4宗罪、但自己都睇到流下男兒淚

個個係度大讚Netflix日劇《First Love 初戀》時，前100毛腦細林日曦就寫千字文怒插，雖然林日曦都表示自己都忍唔住睇到流下男兒淚，套劇亦有佢好睇之處，但都要鬧一鬧套劇。

迴旋處成出戲位

首先迴旋處問題，林日曦指佢一口氣睇晒九集，主要原因都因為佢係取景北海道札幌，林日曦強調札幌就好似佢第2個屋企咁，近7、8年都斷斷續續喺札幌居住，所以佢特別留意劇中每個場景。但故事開始時女主角揸住架的士入迴旋處的時候，就被林日曦發現札幌係無迴旋處，仲上網搵到嗰個迴旋處係距離札幌兩個鐘車程嘅另一個城市旭川。林日曦就表示「咁你話人哋接到幾個order由札幌揸去旭川唔得呀？得……但女主角入職訓練又係揸去旭川？都得嘅……但男主角搭的士去中島公園都會經過旭川？」似乎呢個位令林日曦有所出戲？

女主角30歲就縮水

其次，林日曦指出劇中年輕女主角生得好高，但大個咗之後就變到唔係好高。雖然佢都明人類係會隨住年齡而縮水，不過30幾歲就開始縮會唔會太早？

又係「日劇跑」

第3，「日劇跑」。少女、戀愛日劇中，一定唔少得「日劇跑」呢啲劇情，林日曦就認為「冰天雪地唔驚跣親㗎咩？」不過佢都話呢個純粹循例講吓。

老土日劇《First Love》首歌都救唔返

最後，林日曦指套劇真係好老土吓，而好彩佢個人又好鍾意老土日劇，自己寫啲劇都好老土，所以都睇到「含蓄喊」，仲表示套劇如果放喺佢十幾歲嗰時直頭可以上埋神檯，封埋做神劇，特別係仲要用埋《First Love》呢首經典歌， 不過最尾一集真係老土到連佢都喊唔出，出埋《First Love》首歌都救唔返了。