Edan＠MIRROR長文叫粉絲反思下提醒「粉絲行為 偶像買單」網民大讚！

Edan回應MIRROR負評不斷：我哋都要反思下

Edan事隔20星期再回歸荒廢多時的Threads，原本以為是輕鬆的話題，然而卻竟然是「認真mode」︰「看見很多人都在threads裏暢所欲言，甚麼都可以亂說亂分享一通，而我為甚麼這麼久沒有玩threads，因為對我而言這裏跟ig沒分別啊。我還是不能想說甚麼就說甚麼，我不想一會兒又被放大然後上新聞，但我今天鼓起勇氣了，我要嘗試盡量地想分享甚麼就分享，所以我現在要亂說一通了，大家準備好了嗎？」他之後隨即轉載一個由KOL所寫的帖文：「鏡仔進場大家可以另覓新淨土了」，即有感而發分享外間對MIRROR或成員們的負評不斷的感受︰「好老實講外界/鏡圈外好多時都會驚咗negative feeling’s towards鏡仔/鏡粉/鏡仔粉大家可以選擇唔理dun give a _，哩（呢）個都係個客觀事實，所以可能有時我哋都要反思下點解會咁同點樣，盡量唔好俾到啲唔好嘅印象其他人(禾甘duck ng duck?)。」

Edan自爆工作人員反映粉絲冇禮貌

他又反思自己可能因為表現不好，因此才會令人有負面觀感：「我要做嘅就係下次做好啲而希望大家會見到。如果我心態永遠只係『你唔鐘意就算囉bye，你一定係hater。』咁我永遠都唔會可以做得更好，令人改觀。」由於後援會解散之前曾經被踢爆鬧「爵屎」做白卡，令外界對爵屎的印象大減，他亦表示都有聽過演唱會工作人員向他反映「你啲fans真系好冇禮貌」：「冇禮貌嘅未必係睇緊哩篇文嘅你，但當有其他人係咁嘅時候，人哋對『爵屎』嘅印象就會變成冇禮貌。」

Edan教粉絲要互相做好少少

他又重提早前fansclub重組一事，見到好多起底、嘈交等等不斷互相惡意攻擊，Edan呼籲各大粉絲做好少少：「甚至最後5強其中一隊候選人托同事送禮物俾我又被扭曲成『賄賂』定唔知咩。哩啲所有一切都係我最唔想見到嘅嘢，點解要咁呢？所以可能只要大家都做好少少，互相提點，互相尊重，有禮貌地去表達觀點可能大家對我哋嘅印象都會好啲。」

Edan抒發完情緒之後，笑稱自己也不知道自己可不可以這麼真實，因為實在有太多要顧慮的東西，但又非常想講：「既然演唱會都講咗要做『ED偶像』，咁我就講下啦。明嘅就明，唔明嘅就點都唔會明。」回帶到今年8月Edan的個人演唱會，他提到可用3句金句「感恩感恩」、「應該可以嘅，但我要問下經理人先」及「呢條係一條好好嘅問題」去回應擊退各方批評或刁難和攻擊，不過卻一度被網民批評不顧偶像形象兼小家。

連日公開酸民DM：皇帝唔急太監急

Edan在一連三場演唱會中瘋狂自抽，重提自己向姜濤舉中指、提醒好兄弟不要隨便開餐廳做生意，更拿姜濤和髮型師Lydia的緋聞開玩笑等，引來不少同隊成員粉絲不滿，紛紛向Edan DM投訴。Edan當然唔啞忍，一一轉發酸民DM的截圖，不但反擊酸民指「皇帝唔急太監急」，又話「你dmX人就得，人哋公開就唔得，我遮名都好仁慈啦下話」。

大篇幅回應網民批評

Edan今日就發出千字文反駁網民批評，對於外界指自己小家，他回應指自己一直「接受理性、坦白嘅意見」，不介意有禮貌的批評獲意見，但部分網民故意DM人身攻擊、刻意扭曲自己的原意，所以才會轉發DM對話表達自己的不滿。他直言：

「梗係知我咁樣做有人會覺得我好小家(所以我係唔會鬧佢㗎☺️)，覺得一個公眾人物唔應該咁做。喂！啲天皇巨星都唔會咁做啦！你啱啊！我真係唔係天皇巨星level啊嘛。」

「我想同haters講，你哋做緊嘅嘢，係同樣地有人會對你偶像咁樣做，而佢哋亦都會受困擾，我相信你哋都唔會想佢哋suffer。所以，己所不欲，勿施於人。」

企出嚟為藝人發聲：我唔認同做藝人就要啞忍

Edan指雖然有網民會叫自己「唔好理啲haters、無視佢Block咗佢就算」，但Edan指藝人都係人，有權表達不滿或反擊網民的攻擊，但外界卻以「偶像、藝人係唔應該反擊」的潛規則去禁止藝人表達感受：「藝人都係人，藝人都會有感受，但個世界好似禁止咗藝人有感受/表達感受」、「好多人就係藉住『偶像、藝人係唔應該反擊』哩條規則而為所欲為。而好多Artist都因為哩條『潛規則」而選擇『啞忍』，殊不知內心已經千瘡百孔，甚至情緒病。」

網民大讚Edan反駁得有條理

今次Edan出盡力反擊網民挑機，為一直受到攻擊的藝人發聲，不少網民都留言大讚Edan反駁得有條有理：「有文有路既，講野公道、識撈」、「認同既，但佢夠多fans先講得先多人支持，呢堆野係tvb人講就一定比人鬧死，希望佢都幫下一直被欺凌既藝人發聲」、「佢願意用自己嘅影響力去講都算係咁」、「今次反鏡都撐佢」。

Edan反駁網民攻擊全文：

好啦，本身諗住開Live先講，但見有人開始擔心我冇PR，覺得我係嬲豬，覺得我個人唔humble，我惟有早啲同大家分享下我嘅諗法同目的啦☺️(白紙黑字寫低都好嘅👍🏻)

1. 你係咪唔可以俾人話啊？

其實不嬲我都好接受理性、坦白嘅意見(如果唔係我都唔會cut短talk part啦😮‍💨)，因為我都好想做好啲繼續進步
好唔好睇，好唔好聽，好唔好笑，完全係base on個人喜好，咸魚青菜，各有所好，唔鍾意係完全冇問題，我亦都好樂意接受。
但如果係直接msg我一啲人生攻擊，完全扭曲我原意嘅嘢，我就真係想講句「有心啦！」❤️

2. 你唔好理啲haters啦！無視佢Block咗佢就算啦！

其實個個都會咁講，但我可以分享一個比喻俾大家feel下其實係咩感受😂
「你俾人好大力打咗一巴落塊面到，然後身邊嘅人同你講:「算啦，有佢啦。」」
喂大佬！我塊面仲痛緊㗎喎！點無視啊！
藝人都係人，藝人都會有感受，但個世界好似禁止咗藝人有感受/表達感受。

3. Po dm出嚟好小家，好冇PR。

首先，講真，你公海_我我真係算數😂你直接msg我，但係又唔俾我公開(名都遮埋啦喎)，哩個係咩logic?😂😂
再講真，我梗係知我咁樣做有人會覺得我好小家(所以我係唔會鬧佢㗎☺️)，覺得一個公眾人物唔應該咁做。
喂！啲天皇巨星都唔會咁做啦！
你啱啊！我真係唔係天皇巨星level啊嘛🤣🤣🤣🤣

咁點解我要咁樣做呢？就係因為我想俾大家知道做偶像做藝人每日係會suffer啲乜嘢
好多人就係藉住「偶像、藝人係唔應該反擊」哩條規則而為所欲為。
而好多Artist都因為哩條「潛規則」而選擇「啞忍」，殊不知內心已經千瘡百孔，甚至情緒病。
我比較好彩，我心臟真係算強大，情緒都算係比大部分人穩定。但當我發現連我都會被哩啲嘢牽動情緒嘅時候，我想嘗試去做少少嘢，想嘗試去改變少少嘢。
我唔認同做藝人就要啞忍、就要硬食，我相信只要你唔係發脾氣，你有道理，你有禮貌地表達，總有明白事理嘅人係會明白你係會支持你。

4. 將心比己

其實老實講，街外大把唔鍾意我嘅人，但佢哋係唔會浪費時間特登走去睇我啲嘢仲走嚟dm我㗎😂😂
所以我想同haters講，你哋做緊嘅嘢，係同樣地有人會對你偶像咁樣做，而佢哋亦都會受困擾，我相信你哋都唔會想佢哋suffer。所以，己所不欲，勿施於人。
我想改變嘅嘢唔係淨係想唔好再有人嚟_我(我亦都冇咁天真覺得我咁樣講完就會冇)，而係希望大家可以將心比己，其實大家無仇無怨，冇必要製造咁多負面嘅情緒，哩啲完全係vicious cycle。
如果你哋控制唔到，發現_完我先會舒服啲嘅，咁不如你哋dm鬧完之後同我講聲：「辛苦晒，我舒服了。」咁我可能都可以當係做咗善事，唔放喺心到🙏 (當然可能你哋就係想我放喺心😂😂)

5. 總結

講咁多，其實都係想大家做人relax啲，同埋想話俾大家知其實所有人都只係一個普通人。
哩一年發覺，做人要經常開心事事順利身體健康其實一啲都唔容易，每日都有好多不幸嘅事情發生，其實好多人都過得好「苦」。
喺咁嘅前提下，點解仲要想去製造更多嘅「苦」，又何必呢？
不如真係試吓放鬆啲，嘗試欣賞多啲or用另一個角度去睇嘢，可能大家都會開心啲。
唔鍾意咪唔好睇囉，但冇必要傷害人姐，right?

最後我想講我唔係話個個人都要好似我用咁嘅方式去表達，每個人都有佢嘅自由同方法同capacity去應對，但我相信每一個人(包括藝人)都係絕對有權去有禮貌地表達自己的。

其實我個talk show就係想表達類似嘅嘢，有機會再同大家分享多啲😂歡迎大家去youtube參透下☺️

講完，感恩感恩