腹肌馬甲線操練多時終派上用場 Aka拍CK內衣褲廣告 網民嫌太瘦無睇頭
撰文：東方新地｜圖片：《晚吹-有酒今晚吹》圖片、IG@aka_chio｜編輯：Wendy （原文刊於東方新地）
為CK拍廣告硬照 Aka大曬腹肌馬甲線
Super Girls五成員近年各有發展，女團有名無實，更多次傳出拆夥。34歲的隊長Aka（趙慧珊）算是工作量與曝光率高企的一位，去年搵MIRROR為男網內衣褲代言的CK（Calvin Klein），早前亦搵Aka拍了新一輯女裝內衣褲廣告。
廣告中僅穿bra top及底底
Aka率先把6張廣告硬照放上社交網，只見她身穿bra top及底底躺在床上，擺出各式各樣的誘人甫士，其中一張更把牛仔褲褪到幾乎大髀，腹肌及馬甲線盡現。
身形弗爆腹肌盡現網民卻嫌冇睇頭
CK的男裝廣告就搵男團MIRROR成員，女裝就搵女團隊長Aka，雖然能夠與MIRROR睇齊好威威，不過有不少網民集中討論Aka的身形，指她冇睇頭以及操肌過度。
Super Girls屢傳拆夥 Aka單人匹馬上《晚吹》回應傳聞
女團Super Girls（SG）成員Aka（趙慧珊）、Cheronna（吳嘉禧）、Yanny（陳穎欣）、Jessica（蔡明思）和Heidi（李靜儀）於12年出道，曾紅過一陣子，但三年前開始各自有不同發展。Aka和Cheronna主攻唱歌，Yanny已簽約古天樂的電影公司旗下，曾拍攝ViuTV劇集《地產仔》，Jessica嫁台灣老公後轉戰主持，又開設煮食頻道，而Heidi則轉型做時裝達人。Super Girls自18年推出單曲《睡衣派對》後，便沒再推出組合作品，加上過往曾傳出有成員為爭仔而不和，組合屢傳拆夥。至隊長Aka早前單人匹馬上ViuTV節目 《晚吹-有酒今晚吹》時，便一一回應傳聞。
Aka認有成員為爭仔不和
曾傳出Yanny硬撬Heidi牆腳爭食有米監製，Aka在節目直認真有其事，並指當時大家互相unfollow，Aka話：「女仔嘈起上嚟，就係會unfriend，感情嘅嘢，佢哋都冇辦法控制，當時大家係一時衝動，依家有follow番，咁依家大家都有幾好嘅生活。」女人堆是非多，Aka直認以前不時為造型、㨂歌、服裝等嘈交，解釋：「因為始終係女仔，大家各有意見﹗」
感觸回應拆夥傳聞Aka：好掛住5個女仔一齊嘅日子！
雖然組女團時有拗撬，但提到當年女團的日子，Aka突然感觸眼濕濕：「真係好掛住嗰時五個女仔一齊嘅做嘢嘅日子，好懷念每一次工作完上保姆車時嘅時光，因為喺工作完上番車換衫呀，最放鬆嘅時候，真係好掛住嗰啲時光﹗」Aka又指曾經有一位成員在除夕時失戀，當時Super Girls出席倒數活動，四位成員安慰失戀成員時齊齊爆喊，到五人上台時都仲喊緊，Aka話：「呢次係好深刻，fans唔知咩事，我哋上緊台到上到台都仲係喊緊！」
Aka不停自責：如果我多啲關懷同愛護大家，情況可能會唔同
主持強尼問明年Super Girls成軍十年，會再合體嗎？Aka坦言好想同經理人提出要求：「好想可以Super Girls出首歌、開個音樂會、同啲fans一齊慶祝。」強尼又追問慶祝完十年之後還會合作嗎？Aka指真的好難：「依家大家各自做緊自己嘅嘢，真係好難再集合番。」
講到呢度，Aka又再一次哽咽，自責當年做隊長不力：「覺得自己唔夠care大家，付出唔夠多愛。如果嗰時care同愛多啲，可能所有嘢又唔同！」她續指，雖然身為隊長但當時不夠成熟：「嗰時好多嘢做，但仲細唔識諗，淨係想快啲收工返屋企或者約朋友去玩﹗冇更加好咁同大家相處得更好﹗」
Aka自認好酒量：係天生嘅﹗
Aka在《晚吹》豪言「酒量是天生」，更指幾乎冇醉過，她笑言曾有一個男仔帶她去試酒，當中紅酒、白酒、雞尾酒試勻，最後男仔已醉倒，但Aka完全沒醉意﹗不過Aka雖然千杯不醉，不過都有飲醉經驗，她說：「以前每年聖誕Super Girls同CAllStar一齊開party，嗰次真係飲醉，我突然喺地下做拱橋，地下仲要又濕又黑，第二日醒番周身瘀﹗」Aka又指自己醉倒會在地上打筋斗，相當神奇﹗令主持強尼、娟姐笑爆﹗
