8月新韓劇

8月新韓劇 「姐」的抉擇 金泰希大戰金喜愛

流行娛樂

廣告

蘇志燮、宋仲基、宋承憲同張赫等男神已鐵定下半年回歸韓劇懷抱,消息相信令唔少劇迷為之振奮。不過喺男神現身之前, 8月新韓劇 就由幾位美魔女金泰希、崔智友、金喜愛搶先推出新劇。論收視,金泰希嘅《龍八夷》以及金喜愛嘅《Mrs.Cop》首播成績都算唔錯。對於新劇喺今個月尾先見街嘅崔智友嚟講,會唔會有壓力呢?

text-Phoebe

金泰希做睡美人
SBS 水木劇(每週三、四)
《龍八夷》
主演:金泰希、周元
話晒都已經有成2年冇拍劇,所以金泰希對《龍》甚為著緊,更喺開劇前減咗9磅。劇集一開始已經交代富家女金泰希因男友車禍中喪生,佢亦生無可戀,打算跳樓自殺,結果陷入昏迷。至於男主角周元過往幾套劇都係同KBS合作,有口碑有成績,《龍》係佢首部同SBS合作嘅作品,雖然係做醫生,但第1集已經有唔少飛車、打鬥同跳橋嘅動作戲,一個唔該隨時打開新戲路。《龍》喺5號當晚首播,錄得11.6%收視,比起金秀賢、車太鉉、孔孝真主演嘅《製作人們》首播收視亦只得10.1%更為好。而喺今個星期播出嘅第4集,高收16.3%,勁!

愛姐做警察大媽
SBS月火劇(每週一、二)
《Mrs.Cop》
主演:金喜愛、孫浩俊、金民鐘
48歲嘅金喜愛雖已為兩子之母,但駐顏有術,多次被票選為「韓國最美人妻」第1名,去年喺劇集《密會》中,同劉亞仁玩忘年母子戀,非常之前衛。而今次喺《Mrs.Cop》中,則化身陀槍女警查案滿分但湊女零分嘅警察大媽。同劇重有呢1年喺韓國人氣急升嘅孫浩俊,以及男團BEAST成員李起光,對於收視有一定幫助。上星期播出嘅第3集,以9.2%收視,成功擊敗車勝元嘅《華政》。

 

友姐扮學生妹
tvN金土劇(每週五、六)
《第二個二十歲》
主演:崔智友、李相侖
崔智友同權相佑去年齊齊合作《誘惑》,可惜雷聲大收視小,還好友姐年初時放下身段,出演tvN高收綜藝節目《花樣爺爺》,令事業再次回春。今次同樣係tvN出品,tvN近年作品屢獲好評,友姐今次喺《第二個二十歲》當中,19歲就做阿媽,到咗38歲決定同個仔一齊返大學,兼重遇初戀男友……話說阿媽回到學生時嘅劇情,今年初另1位阿姐金喜善喺《Angry Mom》已經做過,友姐今次會扮成點?28號開播就知道。

YOU MAY ALSO LIKE ...