2020香港小姐選舉又翻生？！馮盈盈、何依婷傳授入圍秘訣 轉玩網上面試 即日接受報名｜頭號粉絲

港姐視像面試馮盈盈、何依婷傳授搶fo秘笈

2020港姐選舉記招今日下午舉行，先由主持麥美恩和陸浩明以標榜筍工去介紹參選港姐，大讚「港姐」呢份工係絕世筍工，既可彈性上班時間、可以環遊世界、可以識好多人、年薪千萬等，講完一大輪，終於講出所謂新玩法，陸浩明話：「今年會以網上形式面試，無論你係多倫多定肯亞，都可以透過視像面試，只要你係17-27歲，就可以劃破地域界限，大家由呢刻開始接受網上面試，截止時間係6月21日。」

港姐面試馮盈盈教路：講乜都講一半

然後請出一班前港姐畀大家面試貼士，出席包括有何依婷、鄧卓殷、馮盈盈、劉佩玥、黃嘉雯、王菲、胡佩玲等，何依婷教大家唔好用美顏app及太濃妝，而鄧卓殷就話：「要諗點喺個框框度令人眼前一亮，自我介紹嗰時可以加啲才藝rap住介紹。馮盈盈就話要保持神秘感：「要等評判對你有興趣，乜都講一半，等入咗圍再講埋下半，畀佢哋知你識玩網上平台，因為呢個係大趨勢。」

4月初由宣布停辦，兩個星期後由停辦改口又復辦，仲話以網上真人騷形式，又話只會喺big big channel播出，會成為首位網上平台誕生的港姐咁話，點知今日記招上，無綫非戲劇製作總經理余詠珊：「條件始終係最重要靚，網上網下同樣精采，會有新環節出現，相信參加者會幾辛苦，但著靚衫然後有個好大舞台的final都一定會發生。」即係只不過係面試改為網上進行，其他並無新意，其他一切照舊﹗