193@ERROR罵買家文盲遭連登網民聲討 「霸氣」回應：唔鍾意咪唔關注我囉
撰文：EVA｜圖片來源：193IG、LILABOC IG截圖、連登討論區截圖
經營網店遭買家追退款
193早前暗寸TVB節目是老人台，又和大台高層曾志偉隔空互窒，令他人氣急升，帶挈ERROR隊員甚至有份拍攝的《花姐ERROR遊》等節目再被熱炒。可是做藝人，言多必失，昨晚在連登鬧得沸沸揚揚，是由於有網民在連登討論區開post，透露自己於今年1月在193經營的網店LILABOC付款買帽，不過因為未收到貨，分別於2月、8月向網店及193 IG查詢出貨及退款事宜，一直得不到回覆，最終選擇在網上公開聲討。
公開同買家退款對話：燒俾你
網店LILABOC隨即回應事件，更將inbox和該名買家處理退款事宜的截圖，放上IG story，在截圖中，LILABOC的用字極之辛辣甚至涼薄，包括「係咪唔識中文」﹑「一月入錢嚟做乜X」﹑「文盲」﹑「點知你用乜Account」﹑「定係燒俾你」。
網民要求公開道歉
LILABOC回應事件後，引發連登仔連開多個post聲討193，不但呼籲網民unfollow他的 IG，甚至有人因為這件事而想重看TVB，又要求193就事件公開道歉，更表示「ViuTV努力咁耐，俾193一鋪搞掂」。不過有193的支持者就繼續撐偶像，指去年9月賣的衫，該買家竟然在今年1月才入錢，分明向偶像挑機。
繼續挑機網民：享受block人嘅快感
之後，LILABOC再就事件回應，言詞間繼續挑戰網民底線：「有個唔睇未嘅人，過咗三百蚊去我account，然後唔知幾耐之後再叫我退錢，已經好奇怪，唔知當呢度係ATM定點。再者，間舖冇營運咁耐，每日都99+request，我又唔係急住賺嗰少少錢，所以冇乜撳入去睇，應該來來去去都係問頂帽有冇現貨，tee sizing之類。然後條友上網話我呃錢？？？自己X咗然後公審我？鍵盤戰士再話返我公審佢？咩世界？我不嬲對住啲我唔鍾意嘅人都係冇禮貌，唔鍾意就唔好買囉，唔鍾意咪唔關注我囉，啲鍵盤戰士打幾隻字我又唔會痛嘅，我都幾享受block人嘅快感，你為咗我開個新Account，然後我用一秒又block咗，幾爽！」
