馬國明大行岳父政策 湯洛雯買車唔使男友靠自己｜頭號粉絲
撰文、圖片：東方新地｜編輯：八卦妹（原文刊於：東方新地）
馬國明行岳父政策大成功
最近馬明好像已經忘記自己太古城有頭家，無論收工定放假他都在靚湯的紅磡寓所出入。日前下午2時左右，馬明駕車與靚湯外出後返家，在屋苑大門口停了一陣，未幾靚湯父親湯鎮宗上車，馬明把車泊入屋苑的私人停車場，上樓唔夠十分鐘，湯鎮宗離開寓所，馬明則在靚湯香閨逗留約兩小時，二人才再次外出。
「明火靚湯」甜蜜睇車
馬明曾經講過自己有鋪睇樓睇車癮，這日他駕車直駛九龍灣展貿中心，靚湯一支箭走到近年深受車主歡迎的Tesla電動車陳列室，望住一架新款電動車心心眼，馬明非常有耐性，陪住女友聽車行經紀講解，之後二人走到停車場實地摸車，靚湯更坐上司機位感受。現場所見，靚湯似乎已經有心頭好，而馬明就幫眼兼畀意見，二人有商有量，返回陳列室後靚湯更坐低搞手續，現場碌卡落了一千元訂金。
好男人形象已根深柢固的馬明，與內外兼備的靚湯走在一起，日日都嗒糖身形愈見幸福肥，體質易肥的靚湯就更加唔使講，這日見她上身穿黑衣下身著長裙包到冚，仍遮掩不到超有肉地的厚切身材。一對熱戀中的情侶發現本刊記者後更任影唔嬲，馬明表示：「其實我哋出街拍拖畀人影到真係好OK，我哋都冇所謂，不過有屋企人喺度就唔好喇！」他更預告睇完車下一站齊齊返靚湯屋企食晚飯，有靚湯飲又有飯食，難怪馬明流連忘返，希望馬媽媽唔好呷醋，孝順仔馬明都係想全速前進，早日為馬家娶個一百分新抱。
厚禮冧湯洛雯失敗
在大庭廣眾二人未見有親暱的身體接觸，不過一切盡在不言中，行去買飲料時馬明對眼未離開過靚湯，之後再帶住女友行盡汽車展銷會，邊行邊為靚湯物色好車。知情者說：「靚湯架車壞咗，馬明不知幾緊張，猛話買過架新車，仲話送畀佢做定情禮物，唔使整嚟整去，不過靚湯份人好念舊同埋唔鍾意揮霍，拒絕咗馬明好意，唔想咁快換車住。另一方面靚湯亦唔想畀人講閒話，所以唔會收馬明咁厚禮。」
至於睇車當日靚湯為何會碌卡落訂呢？本刊記者有上前了解，靚湯亦大方回應：「哦！嗰架車超級多人排緊隊要買，我都係湊熱鬧，畀咗一千蚊訂去排，就算排到都要一段長時間，到時先再決定究竟買唔買，唔買都係蝕一千蚊，我唔識車㗎，所以先要馬明同我嚟畀意見，不過真係唔一定買。」馬明原來識踢波之外仲識車，靚湯又發掘到男友另一長處，她睇中的電動車價值約40萬，對於有家底近年又升呢一線的靚湯來說，實在是濕濕碎，根本不需要馬明出手。
