【入廚男生加10分】韓星齊做Chef精

流行娛樂

廣告

男人入廚係咪分外有魅力?我估係,單睇《12道鋒味》嘅謝霆鋒同《深夜食堂》嘅小林薰,都長「煮」長有就知。喺韓國方面,近呢1年有關下廚嘅綜藝節目亦突然暴增,而且全以男藝人做主持為賣點,男星成詩京、孫浩俊以至男團SHINee成員Key,全部由揸咪變揸鑊鏟嘅煮食男。而自從多個下廚節目面世後,韓國其中1間網上購物平台嘅電飯煲銷售額升幅達3成,睇嚟呢股廚男熱亦唔係玩玩下咁簡單。

text-Phoebe

男星煮得又睇得
收費電視台tvN年初嘅《一日三餐》「漁村篇」,將車勝元同柳海鎮帶到漁村留宿3日,並自行解決溫飽問題,向來都man味十足嘅車勝元,喺節目中多次展現出鮮為人知嘅精湛廚藝,令收視節節上升,其中1集更以14.2%打破tvN電視台有史以嚟嘅收視紀錄。除咗《一日三餐》之外,同類型嘅節目重包括《今天吃甚麼》、《點餐吧》、《拯救廚男》(又譯《白老師家常菜》)等等。去年9月開播至今嘅《今》,不時請嚟最佳或大熱餐廳廚師,將最受歡迎菜式,簡單快捷地教授予2名主持人,由傳統韓式料理到墨西哥卷餅都挑戰過,而菜式多變之外,主持人亦係亮點,貴為音樂才子嘅成詩京向來都有唔少女fans,近年擔任嘅綜藝節目都有一定收視,喺《今》中除不時同另一主持申東燁互串外,有時煮煮下更會攞支燒酒出嚟飲,非常家居。

節目刺激廚具銷量
隨住唔少下廚飲食節目暴增,煮食男愈來愈受歡迎,有主廚CEO之稱嘅白鍾元喺tvN新節目《拯救廚男》中,就連同4位料理白癡藝人——金九拉、孫浩俊、朴正哲、尹尚,向觀眾介紹一啲可以喺30分鐘內完成嘅簡單菜式,如泡菜鍋、炒飯、萬用醬油或咖喱等,材料雖非珍饈百味,但保證食過翻尋味,節目推出後,曾以7%超越同時段嘅其他電視台節目。與此同時,據韓國報章所指,近月購買廚房用具嘅韓男人數漸增,而喺網上購物平台嘅電飯煲銷售額升幅亦達3成,可見下廚節目收視雖然未及鬥智鬥力嘅綜藝節目,但影響力一啲都唔講得笑。

There is 1 comment

Add yours

Comments are closed.