陸永教授「抽象派」攝影技巧 Do姐：原來我一直唔識影相 ｜新蚊娛樂｜
廣告
話說，近日Do姐鄭裕玲就再度同組合農夫合作拍攝TVB新節目《Do晚間看地球》，而Do姐更喺個人社交網率先同大家分享今次拍攝期間嘅趣事！今次Do姐趁機會向陸永請教攝影技術，點知做攝影師嘅陸永幫Do姐影出嚟張相，簡直驚為天人！
撰文：lb｜圖片：Instagram
陸永教授「抽象派」攝影技巧
Do姐同農夫成員陸永及C君喺一齊時，總係火花不斷，不時你一句我一句，笑料百出！最近，Do姐喺IG透露佢哋3個人為拍攝新節目《Do晚間看地球》出發去到外國，Do姐仲大讚陸永同C君都好好學，即使上機都仲不斷睇電子書！
除咗讚兩位後輩好學外，Do姐更自稱自己攝影技術係有限公司，好在有學過攝影嘅陸永同行，所以可以趁機會向「陸大師」請教攝影技術！相信大家都好想睇下Do姐喺陸永嘅指導下，影出嚟嘅相係點！
由未上機到上咗機都仲孜孜不倦學習影相嘅Do姐，最後當然有上載自己師傅嘅作品俾大家睇啦！Do姐笑言「原來我呢世人都唔識影相！」，皆因陸永嘅作品竟然係將Focus放咗喺個景，反而Do姐就out fo！
難怪Do姐都笑稱：「Focus 是要放在後面的，這樣相中人才有朦朧美！此種攝影方式相當難掌握，本人正在努力學習中！」至於陸大師亦回應Do姐：「言重了，失禮失禮。作為攝影家，聽從被拍者嘅意見有時都幾重要，當你猛話幫我影條橋，影條橋，呢張相就自然而生了。」
