陳豪打尖捱鬧、城城被認錯、JW被叫哈比 網民目擊10明星尷尬時刻

1.陳豪被發現違泊又打尖

超市遇到明星機會真不少！有網民指有次在超市排隊畀錢，下個就到自己，突然有個男人衝前打尖，即刻叫對方排隊，對方好有禮貌耍晒冧：「Sorry呀，我買一樣嘢好快，我架車泊喺出面驚抄牌，唔好意思！」網民指見對方咁有禮貌就話：「下次唔好喇，快手啲啦﹗」對方不停講唔好意思，網民指望清楚先知原來係陳豪「我畀完錢出去見到佢上車，原來佢泊喺巴士站，唔怪得咁驚青！」

陳豪被叫錯「黃生」輕鬆化解尷尬

講開陳豪，另一網民指曾在大埔一田遇上陳豪兩夫婦，於是走埋去想影張相，可能因為緊張得滯竟然對住陳豪話：「黃生，可唔可以影張相？」陳豪兩公婆笑了一笑，該網民話：「唔好意思！陳生我口快講錯！」陳豪好nice去化解尷尬：「唔緊要，間唔中都有人叫錯！」

2.劉青雲為老婆拒影相

有網民有次在沙田行大型超市見到高大的劉青雲，同行朋友衝上前問可否影張相仲問：「同助手嚟超市買嘢呀？」劉青雲窒咗一窒話：「佢係我老婆！」然後講咗句唔好意思唔方便影相，就同老婆郭藹明急急腳走咗去﹗

3.星爺驚青被發現出埠

疫情前明星出埠工作如等閒事，在機場遇上明星機會都好高，有網民指以前曾在機場見到周星馳「佢縮吓縮吓咁行驚死有人認出咁行去離境大堂！我忍唔住同佢擦身而過時講咗句：『星爺，全機場都認到你啦﹗』講完之後，星爺九秒九企番直個身，兩頭望再當冇事咁急急腳行咗去﹗」

4.側田不滿無人識篤住個鼻：「我喎！」

有網民指有次去酒吧飲嘢，與同場另一堆人一齊玩，在場有朋友玩魔術表演一下，「有個矮仔過嚟叫我朋友教佢，我朋友一口拒絕，跟住個矮仔好嬲：『我喎，我都唔得？』我朋友問番佢：『你邊位呀？』矮仔被朋友拉走咗，之後先知佢係側田，普通到一個點真係認佢唔到！」

5.Aaron被認錯Leon

講開認錯人事件，除了杜德偉、許志安呢單經典之外，有網民指曾在馬場見到郭富城，即興奮撲前問：「Leon可唔可以影張相？」郭富城黑晒口面答：「我係Aaron！」然後走咗去﹗

6.湯盈盈聽到「錢七」反應大

有網民爆料之前去迪士尼排隊時見到湯盈盈同兩個女，湯盈盈似在搵人不停兩頭望，網民即同身邊朋友講，點知朋友大大聲講：「錢七？邊度？連登女兒係邊？我追得好貼㗎！」湯盈盈將帽拉到好低全程無再望過後面！

7.崔建邦當街被鬧「趕住返去打女人﹗」

有網民爆料多年前在太子一間頗出名的外賣舖外，見到好多人排隊，呢個時候見到「崔建邦喺街泊低架車，行去龍頭打尖，直接叫阿姐落外賣，跟住排緊隊嘅人都起哄，崔建邦被鬧到行開咗，有人好大聲『佢係咪趕住返屋企打女人？』跟住佢無再現過身，唔知落咗嘅外賣單下落點呢？」

8.梁競徽被途人叫揸機

有網民指兩年前去露營見到梁競徽，最初因為戴住口罩一時認唔出，「朋友走埋去問佢可唔可以影相？佢一口答應，跟住我朋友叫佢揸機，佢當場呆咗！後來先認出係梁競徽，以為佢搬咗去大灣區㖭！」

9.JW被食客叫哈比人局打招呼

有網民在餐廳遇上JW（王灝兒），立即通水畀身邊朋友知，點知朋友好大聲問：「係咪唱《矛盾一生》個哈比人？」而另一個朋友勁大聲仲扮JW雞仔聲講嘢：「Hello﹗大家好，我係JW！係咪咁講嘢嗰個呀？」之後JW擰咗個頭過嚟，勁尷尬咁同大家打招呼！

10.森美驚死人唔認得

有網民指多年前在銅鑼灣世貿搭𨋢時見到森美，同朋友互相打量估係唔係森美，朋友一時大聲講咗句：「唔係啦，佢點會係森美，冇咁樣衰﹗」跟住軚門一開有記者影相，森美遞高隻手話：『大家好呀，我係森美！』擺明係話畀我哋聽啦！」

又係森美又係坐𨋢，有網民指年前在觀塘駱駝漆等𨋢見到森美，「佢入𨋢嗰陣，度門閂埋咗夾住佢，佢即刻啤住係電梯掣嘅人黑晒口面﹗」