關心妍5歲囡囡重溫「搶獎」淒涼爆喊 「關家姐事件」被屈到想報警

流行娛樂

廣告

關心妍宣布6月會舉行兩場紅館演唱會,最近接受車淑梅《舊日的足跡》訪問時大談入行時的高山低谷,爆囡囡睇返關菊英「搶獎」烏龍事件後竟喊爆,又講返「關家姐事件」令佢飽受委屈!

關心妍:好瘀,但人生就係咁﹗

關心妍在訪問中談及入行廿年,雖然經歷過不少低谷及風波,但自覺人生好滿足:「人生係應早啲經歷甜酸苦辣,我無悔,當中係好刺激、好難頂、好瘀,但人生就係咁,我依家40幾歲人生都開始倒數,唔可以再揮霍光陰﹗」關心妍表示樂意以自身經歷,跟大家分享,希望大家都能像她一樣走出困局﹗

關心妍 關心妍早前為演唱會拍攝海報﹗
42歲關心妍早前為演唱會拍攝海報﹗(圖片來源:ig@kwansumyinjade )

入行廿年感激3個人

關心妍入行廿年要感激三個人,包括媽媽、羅傑承同老公,佢話:「第一個當然係我媽咪,佢喺我面臨失業時冇收我家用,又給予好大支持﹗第二個係我第一位老闆羅傑承﹗第三個當然係陪伴我走過呢一切嘅老公啦,佢改變咗好多我對婚姻同愛嘅睇法,我以前冇父愛,唔明咩嘢係被愛,我要好強,因為由細訓練唔會有人喺身邊呵護我,老公對我嘅無微不至嘅愛令我可以小鳥依人,我先知道原來自己係女人,唔使死撐、逞強﹗」

5歲囡囡睇「搶獎」片段爆喊:點解要批評媽媽?

關心妍在訪問中提到2008年在勁歌頒獎禮上在關菊英手上「搶獎」事件,場面尷尬,她透露最近女兒練習跳舞時看到當年「搶獎」片段,囡囡當場爆喊得好淒涼,不停問為何其他人要批評媽媽,關心妍話:「我安慰佢要堅強,堅強先至可以面對逆境,所以我依家唱歌就係要唱一啲有意思嘅歌,並唔係為咗攞獎。 至於我日後會唔會出席頒獎禮就留番畀公司去決定,我自己就暫時未有呢個諗法﹗」

關心妍 關家姐搶獎 關家姐搶獎真係令人一世難忘﹗
關家姐搶獎真係令人一世難忘﹗(圖片來源:新傳媒圖片)

囡囡要求上紅館表演

關心妍又指女兒心心好有表演慾,主動要求在6月演唱會上表演,她亦會實現囡囡夢想:「我揀咗首合唱歌《Smile》,係我陀住佢時送畀佢嘅歌曲﹗心心要求唱完打個側手翻,因為佢嘅志願係做體操運動員,所以鍾意打筋斗,佢到時仲會有一件釘晒石嘅晚裝,可能閃過我過﹗」

重提「關家姐事件」 關心妍好委屈!

在訪問中關心妍又提到另一風波,就是網上潮文「關家姐事件」,關心妍指外界信以為真,對她造成很大打擊同傷害,關心妍無奈表示:「當年人氣急升,鍾意你嘅人大有人在,但唔鍾意你嘅人亦好多,如果把關唔好,會好危險﹗當年突然有篇潮文話我去名店買衫,要人家封舖,店員唔肯,結果被炒。發文嘅人係店員嘅弟妹,直指我人格差。其實當時我忙到不得了,差啲連瞓覺嘅時間都冇,點會有時間去名店買衫?我嘅衫全部由設計師準備,依家我做咗人太太就有可能去Shopping。網民流傳咗十幾年,到依家邊個係家姐、邊個係細妹,邊間舖頭都冇人出嚟認﹗」 關心妍指傳聞傳十多年,但她從來都沒有表示過自己其實是「受害人」,又透露當年曾想過報警,但覺得不會找到源頭又唔想再糾纏下去,就不了了之。關心妍又話:「估唔到到今日我再開演唱會又喺唔同網上再度流傳,所以我發覺啲人都幾堅持!不過我有信仰,上帝知道我冇做過就得喇。」

關心妍 趁第五波疫情緩和,闊別紅館十年的關心妍宣布於2022年6月4日及5日,於紅磡香港體育館舉行MaBelle Leo Diamond 呈獻 關心妍 Jade Kwan 約 20週年演唱會。
趁第五波疫情緩和,闊別紅館十年的關心妍宣布於2022年6月4日及5日,於紅磡香港體育館舉行MaBelle Leo Diamond 呈獻 關心妍 Jade Kwan 約 20週年演唱會。(圖片來源:ig@kwansumyinjade )

關鍵詞
關心妍
撰文:東方新地圖片來源:東方新地,ig@kwansumyinjade