鍾柔美Yumi睇《Barbie芭比》影結局畫面打卡 網民：搞彎晒啦！
廣告
16歲的鍾柔美Yumi係TVB女團after class成員之一，以可愛甜美的形象吸下唔少男粉絲，甚至成為咗連登女神之一。同樣喜歡粉紅色的Yumi又點會錯過近期大熱電影《Barbie芭比》，點知Yumi昨日（7日）竟然睇戲影銀幕畫面打卡，仲要係影結局位之餘tag埋華納兄弟，令網民不禁高呼：「成個電影業畀Yumi搞彎晒啦！」
Yumi影住《芭比》結局打卡仲tag埋華納兄弟
大熱電影《Barbie芭比》唔少港人都爭住睇。鍾柔美Yumi都唔例外，昨日（7日）出story睇近期大熱電影《Barbie芭比》，點知竟然影住《Barbie芭比》最後結局的場口，表示心心，仲tag埋華納兄弟、《Barbie芭比》，認真大膽。事後Yumi似乎知錯已刪story，仲出多個story道歉。網民睇到眼都凸表示「成個電影業畀Yumi搞彎晒啦！」「唔識規矩」「包場都唔可以咁樣啦」「家下係咪係得返啲老土戲院會播任達華架啦」「人品要幾差同IQ要幾低先會戲院做呢啲嘢」「仲要tag埋發行係咩玩法」不過有好多網民見Yumi即刻快手刪story道歉都認為細佬女唔識嘢啫「細路女唔識嘢姐 又未夠18你想點樣啊」「影幅相啫，又唔係盜錄」
任達華：最高刑罰是監禁3個月同罰款港幣5萬元
近呢幾年少播咗「影帝任達華」，提醒觀眾在戲院內拍攝及錄影即屬違法，會被刑事檢控，最高刑罰是監禁3個月同罰款港幣5萬元！其實有唔少藝人都有犯過呢個錯！
百老匯電影中心叫過大家唔好再咁做
百老匯電影中心之前都喺Facebook出過post，指愈來愈多觀眾在戲院內拍攝，並將相片或片段上載至社交平台上，電影中心好心留言勸喻，但對方竟刪除留言當沒有事情發生，態度依舊。
重溫許廷鏗都影過《與神同行》
韓國大熱電影《與神同行》在港上映時，許廷鏗亦有入場支持，作為演藝人的佢都竟然試過喺戲院打卡，還要IG出埋post「人人都有錯，重點在於你有沒有勇氣，在還來得及的時候，面對自己的「後悔」」相後仲加上Hashtag「原諒我忍唔住影咗一張」。網友睇到後留言鬧爆，許廷鏗都即時刪除咗相片，改用劇照。
圖片來源：i＠hui_alfred、facebook＠百老匯電影中心、百老匯電影截圖、反戲院盜錄宣傳片截圖
