落選港姐賴彥妤訪問郭富城又出醜 被城城秒速指正 無帶腦返工非首次

直播影住賴彥妤訪問前只顧照鏡

日前郭富城擔任亮燈嘉賓，無綫相當重視，娛樂新聞台全程直播整個活動，儀式完結電視台等候做訪問時，由於一直未熄機，見到賴彥妤只顧不停照鏡整理儀容，未有跟撰搞員或行家交流，明知是直播還對鏡頭擺鬼臉，心情輕鬆之外，估唔到亦腦輕鬆。

郭富城回帶再講一次

郭富城訪問時被問到聖誕節會如何安排，他表示應該會有一至兩天假期，會在派對中扮聖誕老人外， 又指自己作為父親，會帶家人到該商場打卡，因為商場內有很多女兒喜歡的獨角獸裝飾。郭富城答完會帶家人來打卡唔夠三秒，無綫主持賴彥妤就問：「會唔會帶埋小朋友嚟…」即被城城秒速回覆稱剛才已答過，賴彥妤卻不懂反應，郭富城回帶再講一次，對眼望到實賴彥妤，而賴好似被迷住一樣，只是心心眼望住城城不懂反應。被城城「我頭先講咗囉」一句KO的賴彥妤，被網民笑她「金魚記憶」、「無帶腦返工」、「暫時性失聰」、「好在城城好脾氣高EQ」等。

之後郭富城回應出席台慶一事，他指自己是TVB出身，今年又是台慶55周年，好多前輩及他尊重的老師當晚都係在場，但詳情就留番TVB公布，其實默認會出席，但賴彥妤卻再追：「即係你confirm會出席台慶？」郭富城勁有風度答到時大家咪知名囉打圓場，原來賴彥妤仲有一單更經典的「訪問事故」！

賴彥妤訪問姜麗文犯上災難級錯誤

賴彥妤今年訪問在《愛回家》演工人姐姐「Lisa」爆紅的姜麗文時，出現更嚴重的錯誤。今年5月，賴彥妤訪問姜麗文時一再追問，如何跟媽媽慶祝母親節。而姜麗文1歲時遭生母梁子盛遺棄，自小與哥哥姜文杰由父親秦沛湊大，生母並於16年在加拿大因腦溢血猝逝，只要稍為有做功課都知道。

姜麗文高EQ回應化解尷尬

姜麗文被賴彥妤一問之下，沒有顯露不滿或尷尬：「我哋屋企傳統係幾搞笑，反而父親節會同媽咪（繼母）一齊慶祝，因為細個嘅時候，爸爸要飛來飛去做嘢，媽咪基本上係做咗爸爸嘅角色；而母親節係同爸爸慶祝，因為有好幾年爸爸做單親爸爸，因為爸爸今年喺香港，所以會喺哥哥屋企煮餐飯畀佢食，而我亦DIY做咗小小禮物畀佢，呢度唔講賣個關子！」

有片！姜麗文以高EQ應對低質主持！

賴彥妤 雙碩士港姐

賴彥妤畢業於英國高雲地利大學法律系碩士，擁兩個碩士同深造文憑學位，19年參加英國華裔小姐攞冠軍，21年參選香港小姐時被封「英國學霸」，不過最後28強止步，其愛好是跳拉丁舞、滑水及畫畫，更有八級鋼琴資格，絕對是內外兼備。選美魂不死，月前再參加《香港小姐再競選》。

對Body充滿信心又選港姐

落選港姐黃婉恩 受訪者馬時亨：你連名都講錯！

無綫近年安排不少落選港姐加入《娛樂新聞台》或《東張西望》做外景主持，不時因口才或身材成為焦點。20年落選港姐黃婉恩（Yancy）今年1月採訪馬時亨主持的新節目《馬時亨名人堂》以及節目嘉賓林子祥，鬧出笑話更經典。黃婉恩Yancy：「Hello兩位，今日想知點解馬善行會邀請呢…」馬時亨即反問：「馬咩？」黃婉恩答「馬時行」，馬時亨笑笑口：「唔係，咪住，講錯名呀，你連名都講錯，哈哈哈…你一定要cut咗再嚟過﹗」黃婉恩答：「冇問題冇問題﹗」

黃婉恩叫唔出林子祥個名

被馬時亨叫停訪問再重來，黃婉恩未有更正正確全名，索性用「馬生」稱呼﹗黃婉恩問：「兩位好，想知今日馬生點解會邀請阿阿阿…特別嘉賓嚟嘅？」完全叫不出林子祥或阿Lam，相當失禮﹗阿Lam變成阿阿阿嘉賓﹗而黃婉恩對馬時亨主持的新節目未有多提及，不停重覆問了「係咪經常約埋打波？」、「大家會唔會講吓波經？」、「會唔會分享吓大家嘅故事？」、「新年會點過？」等，雖然問題唔夠深入，馬時亨及林子祥都好用心盡量多答幾句，以免訪問有dead air尷尬場面﹗

「竟然唔知馬時亨同曾志偉係兩老表，入硬雪櫃」

直播訪問出街後，成為網上熱話，網民指指黃婉恩不專業又不尊重嘉賓「採訪前做功課係基本﹗」、「佢都三張啦，點會唔識林子祥呀？」、「竟然唔知馬時亨同曾志偉係兩老表，唔使照肺，直接入ICU﹗」、「唔知馬時亨係前高官都唔緊要，唔知佢係曾志偉表哥就大件事，入硬雪櫃﹗」