試當真｜由龍頭走向沒落5大死因 view數大跌 修哥親回：養足精神做好初心

試當真｜游學修連累channel？！

網民狠批《試當真》忘卻初心，大不如前，嘲諷「Sunny仲多人睇過試當真」、「害死豪腎」、「希望阿慈同Yannie早走早著」，並大數5大因素令年輕人離棄。

1.NFT激嬲網民

今年4月，《試當真》忽然宣布推出NFT產品，引起廣大網民關注，當中爭議聲最大，狠批搵笨，火速成為惹火頻道，網民直指若所推出的六千個NFT若全數賣出，《試當真》可袋2,800萬，最後實際係2692個。除此之外，更因NFT係cap圖而被批毫無誠意，「只係將過去影片的cap圖，搵笨！」雖然游學修開直播解答大家疑問，但令許多網民信任跌至新低點，完全唔buy，「游學修行錯步棋累全家」。不過游學修本人對此說法就完全否定，表示大部分客戶都滿意，更直言係算係全港「NFT project最活躍及最多回報的項目之一」，與網民說法不一。

2.Ca姐變修女

有網民指離棄《試當真》，其中一原因游學修同Ca姐（Jessica，陳苡臻）呢段戀情，Ca姐更疑似派帽，令Ca姐世一幻想破滅，「望到Ca姐依家咁已經無晒幻想」、更指Ca姐給修女成為《試當真》沒落主因。有網民教路，提議踢走Ca姐就一了百了「學熊仔頭踢走Santis之後就紅番，多人睇」。

3.校花校草令view數少個零

不少網民指自從《試當真》搞校花校草選舉後再無再收看，直指是低質吸客技倆「校花勉強可以留低，校草可以踢走」、「班校花校草搞死咗，成班冇技能又無觀眾緣」、「以為擺啲後生仔女就吸到客，夾硬谷啲MK仔女出嚟，睇埋Dem Beat個集真係頂唔順，unsub」、「好心學熊仔頭之前都分多個channel出嚟放廣告片」、「校花校草擺明吸客，但做得好難睇」、「成班無樣無智慧喺度圍威喂」、「MK妹發明星夢」。而游學修直播時都有回應校花校草選舉的問題，直認今次真係搞得唔好，啲嘢做得太急「走得太前」，所以11月將會進入「休漁期」，音樂、綜藝都會停一停，著重解決試當真內部問題先，回歸拍片初心！

4.連登彈都廢事彈

網民指連登討論區過去不少連登仔討論《試當真》，雖然負評為主，但至少引起話題，現在連登仔都無興趣講，花生指數隨住下降，「無連登鬧吓，變成冇noise」、「游學修唔認試當真紅係因為連登啫」、「連登無講我就冇睇」、「睇完都無人同你吹水」、「連登仔逢紅必反，而家唔反咪唔紅囉」。

5.江郎才盡定hea做？

有網民指《試當真》持住是本地channel龍頭，拍片質素下降留唔住人，狠批hea做，而且「編劇試當真」系列就被評為無橋要靠粉絲 ，有網民建議學吓其他台搞多啲綜藝同埋吹水節目，不過修哥似乎都唔多受理，堅持要搞好劇場/劇情片「最近哈利波持嗰個，人都唔齊，玩得勁hea同之前魷魚遊戲個種認真差勁遠」、「購夠NFT自己換車換樓就低質hea做」，係「啲片真係悶，已經睇唔明講乜」、「明顯係冇橋啦，江郎才盡又唔認」等。

追加：游學修親回

台主修哥親自就以上傳聞回應：

1.NFT激嬲網民
試當真NFT最終mint了2692個，並非如文中所述「六千個」。
我們亦已經提供了舞台劇飛、戲院實體謝票場門票、903音樂會、明日戰記包場活動等等，更有各類紀念品贈送，定期舉辦Fans gathering，重新實行「徵收劇本」連編劇稿費，校花校草投票及活動參與，活躍discord community，甚至被觀眾誤以為「試當真只服務NFT客戶」，大部份客戶表示滿意，可算全港NFT Project最活躍及最多回報的項目之一，與文中「毫無誠意」說法大相逕庭。

2.Ca姐變修女
文中「疑似派帽」毫無根據，雖知引述網民說話、加上問號及不肯定字句是貴台常用手段，唯有在此理清事實。當中有關我ig帖文稱「更多網民反」，小弟自問長期流連各社交平台亦不見此更多聲音。

3.校花校草令view數少個零
多謝準確引述小弟於謝票場直播內回應。

5.江郎才盡定hea做？
我認為堅持搞好劇場是必須的，因為這是觀眾Day1喜歡觀看的原因；至於綜藝，我一直鼓勵全台多作嘗試，所以一年前搞了「試玩毛」和「試乜都得」，正正是希望同事可以多作嘗試，不被「劇場」困住創意。然而兩周年後，最重要的還是先停下來，養足精神做好初心。

多謝新MONDAY。