解風大阪︳杜如風影A片封面挑戰素海霖? 仲扮學生妹叫：朝偉先輩
杜如風挑戰素海霖影A片封面照
杜如風(Helen)繼續癲喪同大家介紹關西好玩、好食事物。Helen為收視去盡，佢會挑機首位港產 A片女優素海霖拍攝 A片封面照，幫襯一間 cosplay 影樓扮花魁，仲大爆金句「我唔係石塘咀如花，我係大阪如風」。由化妝到配襯服飾，用咗成個鐘有多。拍攝時香港工作人員要求比影樓攝影師仲多，不斷要Helen 擺出誘人甫士，為完成任務 Helen都豁出去，嚟個嫵媚舔手指，再加跌膊露香肩。睇相時 Helen 自嘲話‥「妖女咁又老，我真係覺得好妖艷。不過呢啲兜到客呀，啲日本片都係封面呃到人，導演都瀨過幾次嘢。」最後攝製隊大整蠱，將花魁照仿製成 A片封面，分別有「四十路解禁」、「新人綺麗」、「絕對領域 千年一遇美魔女」亂真度 100%，足以挑戰素海霖。
網民睇完：後生幾廿年可能好過素海霖
唔少網民睇完都表示好刺激「呢啲相好刺激眼球」「驚嚇指數9.5」「時間不留人」「幾廿歲人唔好搞啲咁嘅嘢啦」不過都有網民力撐杜如風後生返廿年可能真係正過素海霖「20年前真係會丁出血」「你知道佢既歷史後 就明白 佢係正宗香港公主」「妝太濃」「後生幾廿年其實可能好過素海霖」
介紹「頭文字 D」主題店：我要買 GTR
11月7 日呢集車迷、漫畫迷同埋電影迷必定要睇，事關 Helen會介紹「頭文字 D」主題店。店內有齊漫畫中出現過的車種，包括藤原拓海的 AE86、中里毅的日產 GTR 32、高橋涼介的萬事得 FC 等等，由顏色到改裝都照足原著。而電影中阿木經典名句「我要買 GTR」可以收埋，因為主題店提供租車服務，一日租車費 30,000 日圓起(約 1,600 港 元)，便可搖身變成拓海或者中里毅。不過想由關西大阪開車去關東的秋名山，大概要走 800 公里路程，揸足一日。
主題店同時照顧到一班未有車牌人仕，店內有模擬駕駛器，提供 50多條賽道。識揀如 Helen揀揸 AE86 劈秋名山，可惜出師不利，一開車就炒車。連炒多次兼炒落山後，先勉強完成，十分鐘收費 1,500 日圓(約 80 港元)。
杜如風扮埋學生妹
跟住推介的校園主題 café， Helen中學生打扮，喺節目中呼喚偶像梁朝偉。又會介紹懷舊雜貨店內，珍藏經典偶像山口百惠罕有水著海報，今晚一次睇晒。
