蔡思貝揸胡鴻鈞波子 男方密接放工約會遭斷正
廣告
蔡思貝與胡鴻鈞去年底秘密撻著，過從甚密愈愛愈高調，早前蔡思貝借用胡鴻鈞家姐的保時捷跑車代步，進一步證實二人關係。胡鴻鈞被指有異性冇人性，與許廷鏗出雙入對的九年情誼亦正式畫上句號，從此不相往來！
撰文、圖片：東方新地 ｜編輯：K.P（原文刊於：東方新地）
胡鴻鈞甘做司機港九各區接送蔡思貝
前年蔡思貝與余德丞拍旅遊節目一撻即著，經常孖公仔出現，又以情侶檔姿態拍住搵銀，不過蔡思貝很快就有新目標，拍攝節目《降魔的捉妖遊戲》後開始與胡鴻鈞熟絡，當時胡鴻鈞身邊仍有密友許廷鏗，蔡思貝一直等時機出現，有指去年5月胡鴻鈞拍劇出意外，加上被指工作態度囂張，被公司雪藏投閒置散，而蔡思貝一直在他身邊支持和鼓勵，令戀情萌芽。胡鴻鈞更被影到十日內三次駕車到港九各區接送蔡思貝，並買定小食給女方，被斷正一齊在車廂時，二人的樣子勁尷尬，蔡思貝更用手機遮面，事後他們均矢口否認拍拖，堅稱只是朋友。
蔡思貝長期佔用胡鴻鈞家姐跑車
「思鈞戀」傳出一年，胡鴻鈞曾口快快直認有發展空間，蔡思貝亦老實不客氣，獨霸胡鴻鈞做司機接送之外，早前更被發現駕駛胡胞姊Sharon的名貴保時捷跑車出入，似乎已和「胡家」一家親。蔡思貝早前出席活動時自爆從未見過「未來大姑奶」，不過卻可自由使用對方座駕，她笑說：「因為我冇車，拍《飛虎3》成日要去啲偏僻地方，又冇外景車接送，所以先借車開工。因為佢（胡鴻鈞家姐）唔喺香港，部車都要有人揸吓，佢知道我借咗佢部車。」日前胡鴻鈞駕駛其銀色日本車，載住蔡思貝離開將軍澳寓所，直達女方北角的家，本刊記者見蔡思貝與胡鴻鈞一齊落車，二人都是素顏便服打扮，肯定不是開工日，蔡思貝自行到家品店購物，與胡鴻鈞分頭行事，記者更發現胡鴻鈞胞姊Sharon的黑色波子跑車亦停泊在蔡思貝寓所停車場，看來已長期被她佔用。據知胡鴻鈞胞姊Sharon身在澳洲悉尼，短期內都不會返港，二人姊弟情深，胡鴻鈞開到聲要借車給女友，家姐亦無托手踭。
