萬千星輝頒獎典禮2024｜一文直擊現場各大花生位！

1 | 譚輝智開場表演繼續做「舞癡」

《萬千星輝頒獎典禮2024》今年一開場有一眾TVB藝人齊齊跳唱《The Greatest Showman》，其中有「舞癡」之稱的譚輝智，在表演的時候比其他參賽者快幾拍，非常突出！

2 | 家嫂王敏奕獲獎興奮大叫「老爺」

王敏奕今晚獲得「最佳衣著女藝人」，王敏奕得悉自己得獎後表現驚訝，在獲得獎項後更興奮表示「其實我頭先唔係著呢條裙，哈哈！哇我攞獎喇！」之後仲興奮大叫「老爺！」搞到全場嚇到O曬嘴！王敏奕見到現場反應之後先話「宜家唔係電視live㗎嘛？」其他藝員即刻開口提正在Live緊，家嫂聽到之後即刻嚇親，然後秒變害羞樣，連聲道歉，場面超爆笑。

3 | Benz雄超搶口 句句窒到爆

今晚「最佳男配角」由Benz雄許紹雄和溫碧霞負責頒獎，不過Benz雄今晚一出場就不停狂窒溫碧霞，又串溫碧霞睇唔到珍姐，又不停逼溫碧霞「噏」個心水出嚟，網民都睇到好尷尬：「Benz好X冇禮貌」、「Benz 雄咩事入左廢老領域」、「喂好尷尬呀，快啲頒啦」等。

4 | 最佳電視劇主題曲表演多蝦碌

今晚「最佳電視劇主題曲」由一眾劇集主演介紹，再由聲夢出身的林智樂和Yumi鍾柔美唱出。林智樂打頭陣唱出的《黑色月光》主題曲《黯月》時，一開聲就破音；之後到蕭正楠介紹自己有份出演的《巾幗梟雄之懸》時，講講吓突然忘詞，一個環節卻蝦碌多多！

5 | 頒獎台突然故障「一沉不起」

今晚另一花生位，一定莫過於頒獎台突然「一沉不起」。明明在頒發「最佳女配角」的時候依然正正常常，但到溫兆倫邵美琪之後， 頒獎枱未能升起，頒獎嘉賓同得獎者要執生拎咪，好在難唔到一班資深藝人。

6 | 林嘉華榮獲「最失禮頒獎嘉賓」

韓毓霞和林嘉華今晚一同擔任「專業精神獎」的頒獎嘉賓。林嘉華一出場就開始重提1980年的舊事，韓毓霞想叫停林嘉華的時候，林嘉華竟然話「冇人撩我，我可以繼續」，之後不斷講，講到Overrun。直至頒完「專業精神獎」給TVB體育組之後，林嘉華繼續拎住嗰獎，又插嘴分享自己去唔到蜜月嚟講，網民都忍唔住狂鬧：「條友真心以為個獎自己有份」、「榮獲最失禮頒獎嘉賓」等。

同場加映：詹瑞文和伍詠薇作為「最佳綜藝節目」的頒獎嘉賓，兩人非常貼近時事，以近日熱門話題的馬清鏗小三「五索」作為講稿主題。詹瑞文甚至將馬清鏗的小三稱為「伍索姑娘」，表示：「我好耐冇見你，我的第一個感覺就是你很索啊，因為你是伍姑娘，我覺得你就是『伍索』姑娘嘛。」

7 |許文軒主持表現跌Watt

連續6年做旁白MC的許文軒在幕後負責介紹頒獎嘉賓同得獎者，不過就對住稿照讀都不斷食螺絲。到頒獎典禮尾聲出場介紹頒獎嘉賓甄子丹的時候，又同人撞嘴，今晚主持表現強差人意。