與神的對話 李敏鎬

text-Phoebe photo-Billy、Tung Special thanks-G music（HK）ltd、L2 Entertainment HK

會飲酒嘅凡人
訪問韓星，其經理人一般都將問題預先篩選，筆者曾經想問某星：「劇中嘅你同現實中嘅自己，性格有咩分別？」百思不得其解會被刪走，難道現實中嘅佢性格差到冇朋友？今次訪問李敏鎬，單係冇篩選，已經值得俾個讚。
出道快10年，覺得自己有咩改變？
「多人認識咗我，年紀都加咗10歲，哈哈！其實都唔係好知，可能係思想上改變咗，其他方面都有好大嘅改變。」
每次因工作關係，出門時總會被工作人員、粉絲包圍，會唔會覺唔方便？
「有唔方便，因為總係喺一齊，冇晒私人時間，自己想做嘅嘢都慢慢做唔到。不過，又唔係唔好嘅，惟有一邊諗多啲好嘢，一邊做落去，其他唔方便、做唔到嘅事就另外搵時間私下做囉！其實平日有時間的話，我都係瞓覺、打機、睇番一啲之前冇時間睇嘅電影、見下朋友、飲下酒咁，基本上，日常生活會做嘅，我都會做，因為我都係個好平凡嘅人。」

大家都稱你為男神，你覺得自己嘅魅力之處係？
「我到底有咩魅力，我自己都唔知，哈哈！全部都係大家對我嘅睇法，應該係話大家製造魅力俾我。或者係大家睇到我展現嘅模樣，同感受到我內心表達出嚟嘅真實感情，所以先會將我當作做男神。（你眼中男神又會係邊位？）嗯……張國榮，佢好有自己嘅氣質，所以好欣賞佢。」

假如結婚了
早前以客串嘉賓身分現身《一路上有你》，見到節目中嘅3對夫妻，有冇幻想自己將來嘅家庭生活？
「同大家拍攝時，相處得好愉快同開心，我之後亦有睇過節目，大家傾下玩下都好好睇。如果將來結婚，我希望另一半好似朋友咁嘅關係，多啲溝通咁就最好啦！」
韓國唔少藝人都有拍攝真人騷形式嘅綜藝節目，假如有機會，你會想拍《Roommate》、《真正的男人》、《我們結婚了》、《叢林的法則》定係《花樣爺爺》？
「無論係咩綜藝節目，都可以體驗到私生活中經歷唔到嘅嘢，如果有機會嘗試嘅話，《叢林的法則》可以令我經歷到辛苦嚴峻嘅環境，如果係《我們結婚了》嘅話，心情應該會好緊張又好期待。不過，對我嚟講，樣樣都試下，咁先可以等大家見到我另一面。」

唱歌/演戲對你嚟講，各自有咩吸引之處？
「19歲已經鍾意做戲，演戲需要長時間拍攝，而且直到播出前，觀眾又需要等一段時間，所以唔可以馬上互動溝通。但當中會帶有深層意義，而且可以俾到觀眾一啲思考嘅空間。唱歌嘅話，就需要上台前準備好，然後喺台上一瞬間爆發出嚟，嗰瞬間嘅快感會更大，所以兩者都有唔同嘅吸引之處。」

開騷係咁加分
雖然李敏鎬來港次數頻密，但開騷就係首次，作為1個演員，深信冇乜幾多個可以令整個亞洲博覽館爆滿。演唱會上重唱近14首歌，對筆者嚟講，雖然唔係話非常動聽，但至少冇咩走音，係唱到下半部分時，把聲有少少沙。舞呢？其實都係簡單動作，見男神有時跟唔上beat，其實都幾好笑。玩遊戲時，以動作扮完蝴蝶、恐龍，再出埋聲扮飛機，粉絲一句話自己生日，男神即時自動唱生日歌，加上情深擁抱，真係「紅到面晒」兼暈大浪。見到台下粉絲高舉「敏鎬，我愛你」紙牌，男神即以廣東話表示：「我都係。」之後司儀要求男神同全場粉絲補祝白色情人節，怕怕醜醜之下，講完「我愛你」再連環送飛吻，真係殺人於無形之中。

演唱會上，李敏鎬公布去年開始嘅「PROMIZ（PMZ）慈善計劃」，佢除咗捐出5萬元美金俾非洲窮困村落，掘井發掘乾淨食水之外，又將自己設計嘅產品喺網上義賣，一舉一動都係幫自己加分。