胡定欣獨自去練跑 進駐海景風水屋冀望增愛情運

流行娛樂

廣告

有名有利的胡定欣獨欠姻緣運,無仔最寂寞,據知她曾求見隱世風水師苗師傅,在高人指點下要搬去香港南邊向海之地,才有望感情有著落。今年已39歲的胡定欣抓緊時間,半年前進駐港島南區一間全海景的風水屋,要離開居住多年的將軍澳區及跑步隊友,可見她對愛情有多渴求。新居靠山望海,胡定欣一有空就獨自外出跑步,一個女人仔跑到攰終需搵個膊頭挨下,希望胡定欣唔使等太耐就有人陪跑啦!

撰文:東方新地 | 圖:東方新地| 編輯:K.P(原文刊於:東方新地

胡定欣投海景屋增強愛情運

向來篤信風水命理的胡定欣,近年在好友黎耀祥介紹下認識了隱世高人苗師傅,苗師傅為人低調,是娛樂圈人包括古天樂、張智霖、袁詠儀、黎耀祥、陳豪等御用的風水師。有傳經他指點,只要跟足師傅吩咐擺陣,好快就見效,所以大家都愈搬愈豪,愈住愈富貴。不過苗師傅並非話見就見,亦不是來者不拒,他只為有緣人睇風水命理,亦無特定要收多少酬金,不過搵得苗師傅的圈中人都唔會出手低。

據知胡定欣早前為了急救姻緣求見苗師傅,知情者透露:「定欣一直都住將軍澳區,師傅話嗰度會旺佢事業運但姻緣會好差,如果想快啲有拖拍就要搬去香港南區近海嘅地方,間屋望到愈多水愈好,咁樣會更加催旺桃花運,事業同姻緣都會好。定欣幾乎所有老死都住將軍澳同西貢區,其實都好掙扎,不 過為咗終身幸福,佢梗係搬啦!最終佢喺港島南區搵到個望住無敵大海景嘅單位,嗰度係豪宅區,住客都非富則貴,增加遇到筍盤嘅機率。以前定欣對結婚生仔都好有憧憬,成就愈高就對另一半要求更高,但又想好似好姊妹胡杏兒咁一搵到Mr.Right就快速拉埋兼生仔,都真係幾矛盾,定欣出年就40歲,佢好鍾意小朋友,唔想做高齡產婦。」搬屋後胡定欣更上一層樓,雖然Mr.Right仍未蒲頭,但她即告別效力十八年的娘家無綫,落實簽約邵氏在事業上再搏殺。

等足大半年堅持不改名

早前胡定欣與黎耀祥及曹永廉等一齊接受訪問,提及以風水命理增強運勢,她直認不諱表示為了搵師傅指點迷津等了大半年,不過她對改名轉運非常抗拒,她說:「我搵師傅唔會一嚟就問感情,桃花運即係觀眾緣,我會問佢點樣可以提升觀眾緣先,工作問完之後先問姻緣,師傅都叫我唔好要求咁高,呢啲都係做人小道理,係一種提醒。都有師傅話我個『欣』字有個欠字會爭啲,但我冇諗過改名,個名係長輩改嘅,唔會輕易改。」

關鍵詞
胡定欣