肥媽紅館騷勁多吉位 要出動漁網𢭃利是
廣告
日前係紅館完成《2023 肥媽面對面演唱會》肥媽（Maria Cordero )，係演唱會瘋狂換上多套戰衣嘅佢在台上又唱又跳，加上又係新年，唱賀年歌就一定唔少得，期間唱「呢首歌」嘅時候更化身屯門娜娜乘機用漁網𢭃利是，被網友狠批「好肉酸」！
肥媽化身屯門娜娜！用漁網向觀眾𢭃利是
適逢新年期間，一向有好歌喉嘅肥媽當然唔執輸，著到成個「利是封」嘅佢當然要唱下新年medley應節，期間多次走近台邊𢭃利，當唱出《財神到》時更出動埋漁網向台下觀眾𢭃利是，仲繞場好多次，一定收利市收到手軟！不過有網友就睇唔過眼，直言唱《財神到》到乞米，好肉酸！
自爆後台被瘋狂剝衫同摸胸！肥媽：爭我好多錢！
另外肥媽係台上又爆料指唔知道今次演唱會要換咁多套衫，每次一落台都被4個人瘋狂剝衫同摸胸，表示如果係泰國被人摸下都要20泰銖，直言後台工作人員爭佢好多錢。
唱歌憶亡夫爆喊！
不過演唱會都有感動位嘅，就係當肥媽唱出《憑著愛》同《Ma Ma I Love You》，忍唔住爆汗，皆因佢諗起2年前因肺腺癌而離逝嘅葡籍丈夫Rick。台下觀眾亦為之動容，不時大叫I Love You為肥媽打氣，不過肥媽就解釋話係開心嘅眼淚，表示係觀眾令佢可以踏上紅館舞台。
肥媽恨去大灣區開騷見大陸粉絲
至於肥媽呢個演唱會就會開世界巡迴，有機會到馬來西亞、美國、加拿大等地，但一向心繫祖國嘅肥媽就話最想先到大灣區開騷，希望可以早日同內地歌迷見面。
圖片來源：facebook@Mariacordero0218
