結婚五周年 陸永連環驚喜冧陸太

資料來源——新假期

陸永與索老婆Rainah在2011年結婚，大女一穎及細女一心分別在11及12年出生，一家四口樂也融融，陸太不時都會在網上晒家庭照！陸太咁靚女，兩位千金都遺傳到其優良基因，長得標緻可愛，真係令人羨慕！

猶記得今年四月時，陸永有份演出的無綫劇《殭》全城熱播，其中鄭嘉穎飾演的「刑活著」大受歡迎，而一穎就有機會打電話同刑活著傾偈！片段中見到一穎面圓圓眼仔碌碌，仲向嘉穎問咗非常有趣的問題，睇過片段的網民無不激讚可愛！

而早前《城寨英雄》熱播，一穎睇到花曼(王君馨飾) 慘死時，忍唔住喊到好悽涼，佢攬實爸爸的樣子實在我見猶憐！所以王君馨其後都特地拍一段片氹番佢！

陸永出晒名錫屋企人，日前係佢同Rainah的結婚五周年紀念日，佢就當然花盡心思氹老婆開心啦！呢日Rainah就在IG上載兩張相並留言︰「突然一束花，突然一首歌，突然一隻鑽戒，突然一大班人，突然被求婚。」第一張相見到一大束紅色玫瑰，而另一張相就見到陸永跪地攬實Rainah，四周有一班朋友影相拍片，Rainah仲似乎感動到眼濕濕！有禮物有驚喜，相信陸太呢個紀念日相當難忘！

內容延讀：
Apple Watch 2正式登場　防水加內置GPS重生
>>> LIKE我們fb <<<

www.facebook.com/newmonday.com.hk