「粗口港姐」梁允瑜你問我答谷人氣 直認想被人包 寸嘴同網民駁火
廣告
「粗口港姐」梁允瑜（Chloe）2021年參選港姐大熱倒灶，事後鬧爆無綫，半年後最終簽約無綫仲有劇拍。梁允瑜近日同網民玩你問我答，被網民指貪慕虛榮時，繼續寸嘴明言恨被人包，仲話唔會戒講粗口，咁有性格，原來有曾志偉加持？﹗
梁允瑜落選發難 獲曾志偉安慰鼓勵
梁允瑜去年參選港姐，一直以大熱姿態，但負面新聞不斷，先被爆中學時欺凌同學兼向老師掟櫈，其後她拮住魚旦爆粗鬧前度片段流出，形像破產，最後十二強止步未能晉身總決賽，落選後梁允瑜即在社交網大講晦氣說話更反轉豬肚話自己唔恨入娛樂圈﹗最後經曾志偉一句說話點醒，最後簽約無綫，並火速安排加入《法言人》劇組。
梁允瑜：我都想畀人包，邊個唔想有錢？
梁允瑜近來努力經營社交網，預告拍片在YouTube開channel，日前梁允瑜在IG玩你問我答，逐一回答網民疑問，更無懼尖銳問題，但就繼續寸寸貢，有網民問「你係咪畀人包？」梁允瑜就答「我都想畀人包，仲使咁忙返工。Sorry我鍾意自食其力。」又有網民留言指她貪慕虛榮，梁允瑜就答：「睇你點定義貪慕虛榮，邊個唔想有錢有力有地位，同埋Sorry我冇諗過釣金龜，我靠自己好足夠，唔鍾意靠男人」有網民重提她拮住魚旦爆粗片「幾時開返間梁允魚旦？」佢就答：「有冇人打本畀我呀？」有網民指曾在街上遇見她，梁允瑜繼續自抽：「你同我 say hi 嘛，請你食魚旦。」
梁允瑜拒戒講粗口：香港地邊個唔講粗口？
對網民的的批評指她「睇你啲對答就知你個人幾咁膚淺」，梁允瑜寸嘴回應：「咁你仲睇嘅，Dear！」有網民重提她爆粗事件「畀你時光倒流，你仲會唔會拍粗口片？」梁允瑜就咁答：「香港地邊個唔講粗口，我唔覺有咩問題，嗰陣嘅我係咁就係咁，即使係而家嘅我都唔會話完全唔講粗口，都係果句啦成年人識得適當時候講適當嘅嘢﹗」
曾志偉賜金句 梁允瑜重新振作
梁允瑜未有受網民挑機嚇倒，繼續寸嘴拋金句，落選港姐果然無港姐包袱，最重要係被曾高層親自安慰兼點醒，落選後心情幾近崩潰的梁允瑜話完全接受唔到事實，聽到「港姐」二字令情緒變波動，後來得曾志偉安慰及點醒：「港姐冠軍得一個，其他個個都被人叫落選港姐﹗」梁允瑜被曾高層點醒後終於釋懷，放下執著，加上家境困難要努力搵錢，所以同無綫多番傾洽後最後簽約做藝員。
圖片來源：IG＠cl.chloee
