王浩信 唐詩詠 螢幕情侶變生意拍檔

流行娛樂

廣告

王浩信 唐詩詠因合作劇集《不懂撒嬌的女人》飾演Cherry同Saving哥,劇中一段未能開花結果嘅感情睇到大家眼濕濕,好在兩人喺現實中擦出火花!不過大家咪諗錯隔籬,佢哋嘅感情只係建基於做生意上,兩人由劇集情侶檔轉做生意拍檔,每人投資6位數字開cafe,實行有錢齊齊搵。

Text-東方新地 Edit-cherie Photo-東方新地,新傳媒資料庫 ,王浩信微博,東星網

王浩信 唐詩詠 合作開cafe搵真銀

唐詩詠 王浩信因合作劇集《不懂撒嬌的女人》而成為觀眾心目中嘅熒幕情侶,二人戲外唔止成為好友,更成為生意拍檔,二人近日每人投資6位數字開cafe,孖住進軍飲食業。唐詩詠自幾個月前同洪永城分手,似乎仍未走出陰霾,每次被問到放低咗洪永城未,佢都苦笑,話「要啲時間,慢慢來」,愛情失意,詩詠當然要努力工作分散注意再加上,之前都有試過搞小生意投資,每次都賺到錢,今次合作相信 唐詩詠 王浩信都好有信心。

Saving同Cherry喺觀眾心目中係熒幕情侶,原來佢哋私下唔止係好友,更係生意上的好拍檔。

王浩信:望三個月內開張

王浩信對此直認不諱:「係睇中咗舖位,但就未講得住,因為牽涉其他股東利益。」正如詩詠之前所講,有望喺呢三個月內開得成!一直同朋友搞緊時裝生意嘅王浩信,話開cafe係想將休閒時尚嘅概念帶到去飲食,被問到cafe會起咩名?王浩信笑謂:「Popcorn Cafe之類。」

大讚詩詠數口精

本身已經營潮牌服裝生意嘅王浩信,再度出擊進軍飲食界,佢充滿信心話:「唔踏出第一步,就永遠唔知道結果!」而對於詩詠呢位生意拍檔,佢亦好有信心,仲大讚對方數口精:「同佢合作時叫飯,發現佢畀錢好有條理,應該交畀佢管數。」

工作不斷 暖男王浩信 未買到樓

《樓奴》(2015年)開始,愈做愈好,暖男王浩信 也自覺順利和幸運,因為做到好多挑戰性嘅角色而觀眾又接受,因為演員係冇得揀角色,他也希望每個角色有深度,問到幾時捱出頭可以買到樓?王浩信說:「仲未㗎,我都未買到樓,呢個最基本嘅嘢都未達到,距離目標仲有好長嘅一段距離,但的確依家比以前嘅狀態係安心好多,亦都令到屋企人安心好多,所以繼續努力啦!

佢又指現實的工作同夢想接近,但夢想唔係用錢去衡量,譬如多咗一啲同時裝有關嘅嘢(指服裝投資)、可能嚟緊又會有飲食有關嘅嘢,都係實踐緊一啲自己好鍾意嘅嘢,作為一個八十後,都要繼續畀心機。」佢更同傳媒朋友講之後每當YoYo做網上直播,自己都會比反應,送心心、送朱古力,同一時間努力買真鑽石俾老婆!絕對是廿四孝老公!

單身詩詠 寄情工作

早前在Big Big Channel的活動,宣布分手的 唐詩詠 、洪永城在後台遇上,二人合照時企到離行離列,場面極尷尬。詩詠特別希望係發展下一段戀情前,先多了解對象,寧願拖長啲時間。愛情空白,詩詠當然要努力工作,分散注意力,其實一向有生意頭腦的詩詠之前投資幾次都獲利,自己搞生意相信都應該難不倒她!

唐詩詠 向甜品舖偷師

早前詩詠單拖去銅鑼灣幫襯一間cake shop,見佢同店員有傾有講,明顯係熟客仔,之後仲一次過揀咗幾款蛋糕匿入廚房試食,邊食邊同店員吹水,乘機偷師。歎完cake,去咗中環會合林子萱再食拉麵,認真擦得!詩詠咁鍾意食,唔怪得要開cafe啦!

雖然愛情暫時處於空窗期,但有好姊妹陪伴,詩詠生活一樣過得多姿多彩!