湯洛雯因情傷突然脹爆、胡杏兒為拍劇谷肥自己! 盤點圈中6個肥妹辛酸史

流行娛樂

廣告

之前講完圈中肥仔血淚史,其實點止班肥仔可憐,圈中亦有唔少女星都經歷過身材肥完又瘦、瘦完又肥,有啲係天生肥底難自控,有啲就為藝術犧牲配合角色造型增肥,如湯洛雯因情傷突然脹爆、胡杏兒為拍劇谷肥自己! 各人背後都蘊藏著各自嘅辛酸史!

撰文、圖片:東方新地丨原文刊於:東方新地丨編輯:白子

湯洛雯因情傷突然脹爆、胡杏兒為拍劇增肥至152磅

嫁得幸福、三年抱兩,40歲胡杏兒婚後冇放任自己變幸福肥,反而產前纖瘦產後極速修身仲極速北上開埋工賺家用,其實對身形同狀態都要求嚴謹嘅杏兒都肥過,不過係為套劇!06年杏兒增肥至152磅演出《肥田囍事》何美田一角,兩個月增完肥再用兩個月減走40磅,吹完脹又還原,最叻係十幾年後即使做埋媽媽都仲keep到!

苟芸慧患甲狀腺疾病令體重暴升

曾經靚到揼一聲、又被無綫力捧兼同天王郭富城傳過緋聞,苟姑娘14年因為患上甲狀腺疾病令體重暴升,最高峰時期超過160磅,當年經常著長袖包到實,不過就算一身黑衣都遮唔住。其後調理身體回復健康,再求助健身公司養成良好飲食習慣,肥苟回復變索苟,由內靚到外!

鄭欣宜一年成功減去100磅

身為肥姐愛女,強勁基因加上萬千寵愛,欣宜由細肥到大體重一度高達230磅。直至03年,肥姐拜託纖體公司老闆好友張玉珊幫手,欣宜有專屬營養師飛到加國跟身監控飲食做運動做機,一年成功減去100磅。不過瘦咗唔代表會開心,戒咗十年薯條雞翼嘅欣宜,自爆最瘦時期精神狀態最差,信心亦冇因此而回復,所以最後接受做個開心有自信嘅肥妹女神。

湯洛雯因情傷突然脹爆

12年選港姐時已經因為五官標緻獲得「 靚湯 」名號,結果18年與相戀四年男友羅天宇分手,疑因情傷導致靚湯突然脹爆體重超過130磅。去年代替黃心穎重拍《 法證先鋒 IV 》,被勒令減肥點知體重不減反增繼續圓潤。直到台慶前夕,湯洛雯再憑節食加運動,配搭新陳代謝減肥法成功減肥變番靚湯。

陳婉衡用錯方法減肥變增肥

又有邊個估到如今係藝人兼健身教練、身材fit到漏成為IG女神嘅陳婉衡,曾經都係肥妹一名?6歲移民加拿大,發育時期食得多運動少、又用錯方法減肥,高峰期體重超過130磅。直到開始學鋼管舞、玩健身再配合埋健康飲食,才練就至今日一副魔鬼身形。

鄧月平為拍戲增肥超過30磅

唔係當家花旦同影壇巨星至會為套戲增肥又減肥,難得新人都唔怕辛苦為角色犧牲! 23歲鄧月平去年就為陳果新戲《 墮胎師 》,一日七餐狂食火鍋隊雪糕增肥32磅,一度因為過肥搞到荷爾蒙失調,試過停經四個月!不過今年初電影製作完成,鄧月平都嗱嗱聲收身減肥,今年中少女身形返晒嚟,仲疑似有新戀情。