風再起時丨兩大影帝梁朝偉、郭富城世紀訪問！網民：高下立見

風再起時︳城城自言一直好欣賞偉仔

話說主持人阿旦就問到二人，當初得知對方係合作對手時心態上係咪需要調整？城城自言一直好欣賞偉仔，基本上對方每一套戲都有睇「之前放好多時間係跳舞，但當我真正演戲嘅時候就不斷睇優秀作品，優秀演員嘅特質係邊度，知道要同佢（偉仔）合作，佢係一位咁優秀嘅演員，當然自己都做足充分準備，其實同我一直拍戲嘅心態無改變。」

風再起時︳拍戲唔係鬥戲而係Team Work

至於偉仔就表示從來都唔同意拍戲要鬥戲，而係一個Team Work：「我覺得大家應該係跳一隻舞，我唔會踩到你 你唔會踩到我，大家就要配合。」佢認為大家去到現場就係平等，「你有咩唔得我幫你，我有咩唔得就你幫我，所以我拍任何人都需要咩心理調整，去到大家就一齊做。」

風再起時︳城城打偉仔最爽

之後二人再被問到對手戲邊一場戲最爽？城城就笑言「一巴打落偉仔塊面」，他透露當時導演翁子光用一鏡到底拍攝手法，「個場戲係幾刺激，因爲我未試過，導演要求咁做，幾難忘。」不過偉仔就反而表示：「我又無咩特別感覺覺得邊場特別爽，但我就覺得成個戲拍落黎都幾享受。」講完臉上仲顯露甜絲絲嘅笑容！有唔少網民睇到就覺得梁朝偉做戲去到唔洗出力就已經係戲，相反城城要好用力去表達自己係好戲，係唔同境界。睇到佢地訪問就覺得好夾硬坐埋一齊吹水，加上性格氣質都好唔同，氣氛有好微妙。

風再起時︳偉仔難得搞gag 練琴練到想跳樓

對於今次合作城城再激讚偉仔好有魅力，「我覺得佢就係一個天生嘅演員，同埋佢講嘅每一句對白都有說服力，係由心講出黎。」而偉仔很欣賞對方嘅工作態度，又指今次新戲角色跨度好大，要演出角色多個階段，城城都完全駕馭得到。

不過訪問中都有搞笑位，話說偉仔係戲中需要苦練鋼琴，主持人阿但問到有無同導演投訴過，偉仔笑言練琴嘅時候就覺得好辛苦，「我久唔久就send 短訊過去，同佢講『我想跳樓呀』然後佢覆我『無事無事，你屋企得3層無事嘅』。」

風再起時︳偉仔大談養生之道

訪問最後二人被問到養生之道，偉仔透露當初做運動嘅原因係因為電視台拍戲時間太長，所以就開始做簡單運動，「係一個放鬆嘅方式，因爲個腦唔洗諗野，而家特別鍾意同大自然互動嘅運動，因爲每日都唔一樣，我覺得好有趣，對我黎講都係一眾冥想。」

而飲食方面，偉仔直言從小到大腸胃好差，好容易食物中毒，「拍戲我基本上只會食蕎麥麵同食菜，返到屋企就食沙律。確保自己永遠都飽但唔會滯。」佢笑言好唔鍾意拍戲食到好飽就會好想訓同唔想工作，「但我可以確保自己唔會肚痛或出咩問題，因爲你肚唔舒服無人知，人地只係覺得你扮嘢唔想拍，唔想有咁嘅情況發生。」

風再起時︳城城堅守一個信念 保持最佳狀態

至於城城就話自己好鍾意食嘢，但又因爲工作要隨時上台表演，「因爲老師俾我一個強大信念，你係一個歌手，要記著無時無刻都要準備唱歌上台表演，所以變成日日好似有個鬧鐘咁提醒我。」有網民表示睇到呢到，就諗起早前身型暴漲嘅姜濤，仲話希望佢要睇呢個訪問。

即刻睇片：