金手指︱梁朝偉突擊商台宣傳大爆接拍原因 林海峰瘋狂擦鞋場面超尷尬

梁朝偉突擊商台宣傳林海峰瘋狂擦鞋場面超尷尬

梁朝偉今日（19日）突擊商台，接受節目《在晴朗的一天出發》訪問宣傳新戲《金手指》，令一班主持一開咪就超興奮。主持之一的林海峰就最為雀躍，不停多方面大讚梁朝偉，唔單只讚梁朝偉夠勤力、鐘意睇書，又話好想再睇梁朝偉做返《咖喱辣椒》嗰啲搞笑戲，令原本已經不善社交的梁朝偉不停以笑帶過。 場面已經夠曬尷尬，林海峰仲要繼續講，仲話梁朝偉「即刻唔答我」，搞到梁朝偉終於開口解釋指：「我反而都享受嗰陣啲演出，因為冇包袱，冇乜人對你有咩期望。」

電影《咖喱辣椒》1990上映，呢套電影其實由周星馳與張學友擔任主演的電影，而戲中並沒有梁朝偉飾演，所以現場梁朝偉顯得非常尷尬。

梁朝偉親揭接拍《金手指》主要原因

梁朝偉今日（19日）突擊商台，最主要的目的都是為了宣傳新戲《金手指》。梁朝偉指今次新戲有一種似曾相識的感覺，首先作品是由莊文強執導，對手亦是劉德華，所以有一種《無間道》班底重聚的感覺。梁朝偉指除了劇本吸引之外，班底重聚亦是今次接拍新戲的主要原因之一：「重聚都係誘因嚟，同華仔都合作三十幾四十年，莊文強就拍《無間道》嗰陣都好愉快，都會成日嚟我哋屋企，平時都有來往。」

梁朝偉在戲中飾演的角色「程一言」，是根據佳寧集團董事長陳松青為原型，今次亦是梁朝偉繼《一代宗師》葉問後，第二套按照真實人物拍攝的作品。梁朝偉在訪問中笑指覺得莊文強特登整呢個故事去引自己去拍：「如果我冇一個實質嘅人物，我諗唔到係點，我可能唔拍，所以佢就整咗個有藍本嘅角色。」

因1原因多次推莊文強劇本

梁朝偉有指莊文強多年來都有畀劇本自己睇，但就因為1主要原因拒絕了好幾次：

莊文強一直都有畀啲劇本我睇，我又真係推咗佢好多次。因為我一睇我又覺得真係冇Feel喎，雖然佢之後拍出嚟好成功，但我真係冇Feel啊嘛，人哋睇咗覺得有feel，會做得好。但我睇完覺得冇feel，咁姐係我未必會做得好。

梁朝偉分享與劉德華的關係

此外，梁朝偉亦指自己與相熟的朋友一起工作會比較放，又提到自己與劉德華的關係，指二人合作多年有一定的默契：「嗰時拍《鹿鼎記》都拍咗幾十集，一段好長嘅時間一齊，嗰陣建立咗一嗰好特別嘅關係，同埋建立咗好多信任，所以我相信嗰默契係嗰陣開始。」

預告下一套作品做科學家

除了宣傳了新戲《金手指》之外，梁朝偉亦大方預告將在下一套作品飾演科學家。向來為角色做足準備的梁朝偉，坦言因為新角色「頭都大埋」：「近期睇好多腦神經書，都唔知自己明得幾多，睇就睇曬。好彩成日都係大學走嚟走去，搵啲專家解釋一下。」

林海峰知衰po《阿飛與阿基》的劇照

事後林海峰於社交媒體出post，出咗張《阿飛與阿基》的劇照，似乎自己衰咗放下狠話，仲話要罰抄一千次！唔少網民都有留言安慰佢，叫佢唔好咁上心算了「咪鬼咁上心啦 uncle」「今次真係誤人子弟」「林公子應該放假抖下」「知錯能改」「希望他們拍返套阿飛與阿基食咖哩椒辣」！