【林鍾大戰】《大整蠱》虛構節目成真！ 林作、鍾培生上《Mean Talk》當面互爆
廣告
【林鍾大戰】由2月起「吹」到宜家都仲未打嘅「林鍾大戰」，一路以嚟都相當多「口水戰」！因為臨近約戰日，林作及鍾培生更係動作多多！早前林盛斌（Bob）、江美儀、農夫等在《大整蠱》曾虛構節目《Mean Talk》，估唔到因為大受歡迎而弄假成真！首集更係請到「林鍾大戰」兩位主角林作及鍾培生作嘉賓，到底二人節目又有咩爆呢？
撰文：海月｜圖片來源：TVB、林作IG
林作、鍾培生上《Mean Talk》當面互爆
「林鍾大戰」即將於９月份正式上演，兩邊都密密操拳做好準備。另一方面、林盛斌Bob、江美儀、農夫早前喺《大整蠱》曾虛構節目《Mean Talk》，更成功騙到李佳芯爆料又爆喊。
估唔到因為網民反應好評，令虛構節目《Mean Talk》弄假成真變將正式喺J2播放。節目更瞄準城中名人做嘉賓，最Mean咁令各人爆出不為人知秘聞。而6月14日晚上10:30播出嘅首集，更請到將於9月進行「百萬拳賽」嘅話題人物鍾培生及林作。
近期動作多多嘅鍾培生及林作，再次重申二人無私下聯絡，不過林作亦有直言：可能同一日生日，所以我都GetGet到哋佢。而鍾培生就直認討厭林作：我睇唔過眼佢成日蝦人！更討厭佢抽其他人水，連死人水都抽、而且佢更蝦女人。
而主持林盛斌（Bob）、江美儀就大爆「其實佢哋兩個係討厭對方，未去到憎，係兩回事嚟嘅」，更直言二人喺鏡頭私下亦有互相問候對方相當關心，絕唔似仇人。另外，更大讚二人「天生一對、非常登對」，尤如戀人一樣。
至於早前林作於社交媒體上提及自己將打腫眼的照片傳送給身處內地的母親，而媽媽見狀由於太擔心立即打俾林作，要求林作退賽。林作母親指：「我俾100萬你，你唔好打啦。」林作表示對此「不為所動」，更嫌媽咪出手低，笑住講自己係佢個仔，至少都畀多50、100萬啦。
https://www.youtube.com/watch?v=pRhicc0uYcE
