「宅男女神」林泳淘下月結婚！秘密地搬新屋同居！強調：非奉子成婚

撰文：Andy｜圖片： 林泳淘IG、《東張西望》、《三日兩夜》截圖｜編輯：海月

「宅男女神」林泳淘下月結婚 強調非奉子成婚

前「東張女神」林泳淘（Wingto），即將同拍拖14年嘅初戀男友林卓立拉埋天窗。近日傳出佢哋將於5月結婚，並且早已秘密地搬入大埔新屋同居。真係好sweet啊~

最近Wingto接受訪問就承認自己即將結婚、婚事暫定5月，不過因為疫情關係仍存在一定變數。佢仲補充：自己好多朋友都未知自己結婚，怕佢地因為透過傳媒先知自己結婚會嬲，笑稱自己擔心會被朋友怪責。

因疫情暫不擺酒僅簽字 強調並非奉子成婚

Wingto結婚本身係值得開心嘅事，但由於香港嘅疫情時常反復，聚會人數仍然被限制。

Wingto向傳媒透露，因為疫情管制，擺酒人數有好大限制。喺人數限制之下，只能叫到家人來，且無法同時招呼朋友，咁嘅情況下擺酒「十分難做」。

佢向記者稱自己並冇隱瞞嘅打算，稱自己原先計劃簽紙結婚之後就同媒體公佈。宜家被人發現咗，亦等到有詳情再同大家講。

佢最後就同傳媒澄清道，自己非奉子成婚，亦唔係趕住要結婚。但佢亦坦承，自己曾對恨結婚，但如今心態不如幾年前心急，對生BB一事亦順其自然。

目前為止，Wingto嘅社交平台仲未出任何post分享喜訊；最近個post係同一班姐妹（利穎怡、尹詩沛、鄧伊婷）一起去睇戲。

女團出道冇人識 港姐落選後入《東張西望》成女神

現年31歲嘅林泳淘原名林冬冬，曾用藝名林熙以組合Lacee Lacey成員出道。

參選2012年度香港小姐雖然落選，但成功簽約TVB。並因擔任《東張西望》主持及J2《三日兩夜》時，憑豐滿嘅上圍而成為一眾網民嘅女神，自此喺網絡上一直人氣高企。

兩年前疑因政治立場與TVB提早解約，其後開拓網上工作，亦喺ViuTV劇集《打天下》、《無限斜棟有限公司》演出配角。