曾志偉有意將藝員訓練班變成《全民造星》！ 王喜寸爆：外判俾花姐咪可以Cut副總經理嗰位

撰文：Lmc丨圖片：花姐@IG、 王喜@IG、MIRROR@IG、曾志偉@微博、馬浚偉@Facebook、TVB丨編輯：海月

曾志偉：希望將藝員訓練班變成真人騷

近日在電視城舉行藝員訓練班面試，參加《2021藝員及電視製作人員訓練班面試》的幕前應徵者多達1,200人，最細的參賽者只有18歲。電視廣播有限公司副總經理（綜藝、音樂製作及節目）曾志偉、藝員訓練班校長馬浚偉、助理總經理（戲劇製作）曾勵珍、助理總經理（藝員管理及發展）樂易玲及集團首席創意官王祖藍也有出席。期間曾志偉提到希望將藝員訓練班變成真人騷：「今年喺特別嘅一年，喺祖藍嘅創意下，希望將藝員訓練班變成真人騷，好似《全民造星》，將學員變成演員嘅培訓過程呈現觀眾眼前！唔一定揀靚仔靚女，睇我同祖藍身形都得，最重要對演藝有興趣、忠誠，熱愛演戲，鍾意呢份工！」

王喜大寸：外判俾阿花拍咪可以cut一個副總經理嘅位

王喜一向出名敢言，他最近又貼出相關新聞，提到：「外判俾阿花拍咪可以cut一個副總經理嘅位，慳好多人民幣㗎，黎生。」該黎生相信是早前狠批對大台的幕後大股東黎瑞剛。

樂易玲強調去年已有拍真人騷計劃

另一方面，樂易玲就透露去年已有將藝員訓練班變成真人騷的計劃，只是因為王祖藍十分忙碌，所以今年才可以實行。此外，身為校長的馬浚偉表示今次藝員訓練班學員學到的東西都會比較全面：「課程有三個月理論及三個月實習，要虛心同唔可以遲到。」