明禎BB晒香港新居相 係IG公開搲著數？！
廣告
「大馬女神」林明禎（明禎BB）去年就將事業重心從台灣搬到香港，短短一年係香港人氣急升，無論衣、食、住、行嘅代言都見到佢嘅身影，可以話係新一代「香港廣告女神」！日前明禎BB係IG大晒香港新居嘅相，見到有個超大露台，但屋內仲係空空如也，所以明禎BB就公開搲著數！
明禎BB係IG公開搲著數！
明禎BB嘅IG Story先用可愛卡通貼紙遮著新居露台外嘅景觀，相信係怕住址曝光，而屋內則貼上梳化、床、焗爐、枱、浴缸等可愛卡通貼紙，並留言「歡迎任何傢具贊助」。
短短一年成為新一代廣告女神
憑著一口唔咸唔淡嘅廣東話、加上有玲瓏浮凸身材嘅明禎BB，名符其實「樣靚身材正」！自去年來港後嘅發展，明禎BB與子華神出演電影《飯戲攻心》，立即成為票房冠軍，明禎BB人氣再度急升隨即成為眾多品牌及廣告商嘅寵兒，大量廣告嘅出現令佢形象亦更加入屋。代言產品包括有運動品牌、飲品、遊戲機、手機同按摩椅都有，相信今次係IG公開搲著數，好快就會有贊助商搵上門！
明禎BB嘆香港樓價太貴
雖然有接近30多個廣告代言係手，但明禎BB同大家一樣都覺得香港樓價太貴，笑言如果係香港買樓要多拍10年廣告先得。不過佢都希望有一日可以係香港置業，仲透露因爲自己係馬來西亞住慣獨立屋，所以未來係香港買樓都會首選獨立屋，最希望可以景觀開揚靠山，同埋有大玻璃窗同露台，見到今次嘅相相信好啱明禎BB心水。
曾被爆出嫌代言價出手太低拒絕邀約
2014年係網上爆紅嘅明禎BB，翌年就離開家鄉馬來西亞飛到台灣發展，期間都拍過唔少台劇。不過出道無耐就曾被爆料指對公司嘅工作有意見，例如控慾強、精打細算，會嫌棄廠商開價太低唔符合經濟效益，就會拒絕邀約，不過最後經理人公司出面否認。
圖片來源：IG@minchen333
