新四十二章 | 靈灰安置所扮大學 網民鬧爆劇集求其
《新四十二章》︳全部女角都扮醜
《新四十二章》的女角擔當分別係龔嘉欣同江嘉敏，不過呢2位女主角都要為劇集大犧牲，江嘉敏就最出事，因為28歲的江嘉敏被監製落order為劇剪短頭髮，以男仔頭造型飾演「現代韋小寶」劇中飾演擁有數學天賦的邵桂芝，在潛意識中連結了韋小寶的經歷，每次瀕死時都會出現解決危機的提示。結果髮一剪，女神形象從此降lv，仲搞到俾仔飛。而龔嘉欣喺《新四十二章》中飾演「豬肉西施」敖螢嬌，在另一維度會與清朝第一勇士鰲拜連結，在現實世界中則同樣會美人生鬚。龔嘉欣早前接受訪問時就透露，為了這個滿面鬍鬚造型，吃了不少苦，因為本身有濕疹，黐鬚對膠水會敏感，更曾引致滿面紅點。她每次黐鬚後又不能進食，要落妝才可以食嘢，因而要麻煩化妝部同事為她不斷上妝落妝。唔少網民對啲女角變成咁都無咩好評「龔嘉欣成面鬚其實好趕客，TVB以為呢啲叫創新」「搞咩啲女角全部都醜化」
《新四十二章》︳黐鬚馬虎穿晒崩
龔嘉欣在《新四十二章》中飾演「豬肉西施」敖螢嬌，「敖螢嬌」造型滿面鬍鬚早前已在不少預告片中曝光，不過就有不少眼利網民發現，龔嘉欣的黐鬚Look頗為馬虎，近鏡看不少膠水痕跡披晒口。
《新四十二章》︳屯門曾咀靈灰安置所取景扮大學
陳豪、龔嘉欣、江嘉敏、周嘉洛等主演無綫新劇《新四十二章》在週一首播，在劇集播出後，觀眾和網民對劇集的評價好壞參半。在最新一集播出後，有眼利的網民就發現眼看是普普通通、正正常常的大學場景，竟然是在位於屯門的曾咀靈灰安置所內取景。在《新四十二章》中出現的「大學場面」又的確幾自然，如果冇網民提出的話，相信大部分觀眾都未必能夠發現得到。
TVB取景求其 網民表示無言：間大學真係夠晒熱鬧
網民對TVB以屯門曾咀靈灰安置所扮大學一事，都表示覺得非常無言，認為用靈灰安置所扮校園的話，會需要動用到大批臨時演員，難免會打擾到先人，對先人不敬；同時亦有網民留言嘲笑TVB本身就取景求其，留言恥笑道：「最後是否BBQ完場，至少唔驚冇爐，一樓大把」、「疫情下除咗口罩來拍攝，只有呢類地方唔會有人投訴。(逆向思維的一種)」、「 TVB咁都諗得出，間大學真係夠晒熱鬧」等。
《新四十二章》︳初版海報被抄襲 同大陸劇似到十足十
早前亦有眼利網民發現，《新四十二章》海報設計另有乾坤，巧妙同人撞橋，未知是否屬劇集致敬部分之一。內地劇《一路繁花相送》講述都市愛情，改編自青衫落拓同名小說，由鍾漢良、江疏影、炎亞綸、李晟等主演，喺2018年播出，早過《新四十二章》好多。
睇返兩套劇嘅海報，發現《新四十二章》都巧妙地撞足《一路繁花相送》，眼利的網友寫道：「兩款海報都係主角排排坐」、「部分角色同樣翹腳chok樣」、「海報背景都係淺色主調」、「劇名字眼都同樣由紫色漸變至藍色」。為咗驗證兩套劇嘅海報有幾神似，有網民曾經用Google影像搜尋功能，上傳《一路繁花相送》海報，結果竟同時驚現《新四十二章》初版海報，睇嚟就連Google都認唔出兩者分別。
《新四十二章》再更換海報 竟似足MARVEL
後來無綫再換《新四十二章》宣傳海報，依然無辦法洗脫「抄襲」罪名。有網民發現《新四十二章》正式播放版海報同荷里活大片《復仇者聯盟3: 無限之戰》極似，他們留言寫道：「背景同樣太空銀河系為主」、「主要角色列陣排位接近一樣」，但無綫《新四十二章》版本，顯著設計無咁精緻，用色較為粗糙。
