慎入《半世紀的諾言》 哭笑120分鐘

流行娛樂

廣告

由《海雲臺》、《戇爸的禮物》到《半世紀的諾言》,導演尹濟均除每次都刷新票房紀錄之外,更能令觀眾喊足大半場。《半》故事發生喺50年代,德秀(黃政民飾)喺戰亂中同父親以及二妹失散,從此成為一家之主,為供細佬妹讀書,不惜去到德國做礦工,為咗個妹嫁得風光,又跟大隊去越南做僱傭兵,連腳都炸斷一隻,為咗了解阿媽心願,大海撈針都想搵番失散嘅細妹。為承諾、為責任到底,可以去到幾盡?

text-Phoebe photo-Billy(訪問)

維穩的阿甘
影帝黃政民喺《半》中,同女主角金允珍由後生做到老,電影去年喺韓國上映時,打低荷里活大片《哈比人:五軍之戰》,入場嘅1,400萬名觀眾之中,更包括總統朴槿惠。電影講韓國人奮鬥史,有人睇完覺得似《阿甘正傳》,亦有人睇完覺得電影教育下一代要以國家為先,甚有維穩feel。上星期導演尹濟均去到澳門出席「第九屆亞洲電影大獎頒獎禮」前夕,超級無敵細心地解答咗我嘅疑問。

《半》嘅故事聞說係以你爸爸為藍本?
「04年啱啱生咗第1個小朋友,做咗爸爸之後,自不然會諗起過咗身嘅爸爸,佢一生為家庭,受咗好多委屈,好痛苦,但一直都冇機會報答佢,於是就想拍1套關於家庭、爸爸嘅電影。不過當時冇人肯投資,因為嗰陣我嘅作品票房好差,直到09年《海雲臺》大收,大家開始對我有信心。」

韓國有好多演技一流嘅演員,點解會搵黃政民?
「05年我監製《我的人生中最美麗的一個星期》時,已經覺得佢係位好真實嘅演員,好欣賞佢,所以當我寫《半》劇本時,完全係諗住佢嚟寫。到12年底寫完劇本之後,我打俾佢,同佢講《半》嘅故事,佢聽完之後,劇本都唔睇就話拍,呢樣嘢係韓國其實好罕見,亦都好感謝佢。」

男主角一生都為他人、為國家付出,你想年輕人都有咁嘅心?
「大家唔好忘記,韓國有今時今日嘅成就、大家過得咁富裕,全靠上一代付出咗好多血汗同犧牲,我希望韓國新世代唔好忘記呢樣嘢。其實就算香港或者係全世界好多國家都一樣,大家雖然而家生活得好好,但以前可能都曾經好似韓國咁,經歷過艱難嘅時期,由祖父母嗰代付出好多,換嚟今日嘅成就。」

唔少觀眾睇完都話有《阿甘正傳》感覺,你認同嗎?
「其實每個國家都有代表佢哋近代史/國家動盪嘅電影,美國可能係《阿甘》,中國就係《活著》,我知好多人都覺得《半》好似《阿甘》,我都覺得係融會貫通到,都係以人物出發,去側寫歷史。」

「偶」有驚喜
點解會搵東方神起嘅允浩演南玲一角?
「佢嘅角色(南玲)係真實存在,係大韓民國70年代好紅嘅歌手,所以casting時,我要求搵個現實中一定係有人氣又靚仔嘅歌手,第2個要求係呢位歌手一定要係全羅道出生,因為對白要用方言,第3個要求係nice,允浩係我第1個cast,一見到佢,雖然佢好年輕,但好有教養。
「以前其實我對idols都好有偏見,認為佢哋剩係sell靚樣,唔識做戲,idol做戲好難得到觀眾認同。但今次搵咗允浩之後,我都拋開偏見,其實佢又唔係我想像中咁差,同埋即使佢係idol,態度都好好,演技亦都好有潛質。除咗佢之外,EXO嘅D.O.、任時完、李準都係好有潛力嘅idol演員。女仔嘅話,秀智我都好欣賞,但佢呢排出咗單新聞(指與李敏鎬拍拖),我真係好傷心,哈哈!」

如果以觀眾角度嚟睇,電影最感動你嘅係邊幕?
「好多觀眾睇完,都覺得係黃政民喺節目搵番妹妹嗰幕最感動,但我個人就覺得係最後嗰幕,佢對住爸爸張相講兌現咗承諾係最感動。現實中,我都有為過妹妹嘅婚事奔波,好擔心,亦為家庭付出過唔少。其實好似今次嚟到澳門,有記者訪問我,我都覺得好似同爸爸有所交代咁。」
上映日期:4月9日