影帝「社恐」梁朝偉旅居日本30年一個原因拒學日文 網民證實：親切又好相處

梁朝偉旅居日本30年一句日文都唔識：唔想同人講嘢

61歲影帝梁朝偉近日開咗抖音，拍片講開自己好鍾意旅居日本，但一直以嚟都無特登去學過一句日文，其原因係佢唔想同人講嘢「在日本生活了這麼多年，加上以前滑雪經常來，已經快30年了，我從來沒有學過一句日語，因為我不想和別人講話。

影帝梁朝偉仲教埋你點克服社恐！

影帝仲喺抖音拍片教你克服社恐3招，第1招－「微笑」，第2招－「揮手」，第3招「比心」，似乎影帝都係以第3招面對公開場合，不過網民就認為偉仔最強招數應該係拖住太太劉嘉玲。

網民督爆：明明就好識同人相處！

雖然梁朝偉有社恐，但並唔代表佢係一個難相處的人！梁朝偉喺圈中都有唔少好友，抖音中有條片講到老友莊文強都有表示，梁朝偉好喜歡12點時打俾佢說一大堆話。而且早前就同41歲日本男神妻夫木聰相約齊齊去到位於六本木的著名食府「鮨SAITO」相聚，妻夫木聰形容偉仔係「從來未遇過內心如此善良的人」，似乎偉仔應該識1、2句日文嘅！

梁朝偉親切得令人受寵若驚

梁朝偉對於街頭有粉絲搵佢合照等基本上都來者不拒，有網民就表示早前曾於日本滑雪時撞過梁朝偉，當時剛好遇到偉仔喺隔離台食飯，佢想起身同偉仔打招呼，點知偉仔即刻示意叫佢坐低，唔好驚動到其他人，跟住2人仲傾起計，偉仔的親切令網民表示簡直係受寵若驚添，結束之後大家仲一齊合照，佢表示真係好興奮，多謝偉仔俾咗一個咁特別的回憶佢！

TVB波波24歲生日時都有撞過男神合照，仲話畢生難忘！波波膽粗粗上前邀合照，梁朝偉唔止一口應承，仲肯除口罩輕輕攬住波波肉臂，呢一攬搞到壽星女勁興奮，昏迷了兩個鐘仲話唔捨得沖涼。

梁朝偉的社恐事件 令佢雙眼更加識做戲！

梁朝偉有唔少「社恐」事件，例如佢會獨自睇電影，跟住買六張戲飛，令人唔好打擾到佢，其次佢會飛去倫敦只係喺公園餵白鴿等。梁朝偉抖音亦有親證自己的社恐問題，表示其實都因為咁而幫助到佢做戲，佢話點解啲人成日覺得佢雙眼識做戲，可能就係因為佢係一個唔識點樣用言語表達自己的人。

梁朝偉是最型的社恐 最懂享受ME TIME

唔少網民都認為梁朝偉的社恐都特別有魅力，因為佢係一個最懂得享受ME TIME的人！梁朝偉曾經講過佢好享受ME Time，細細個已經係咁，佢仲話其實自己本來就係一個普通人，同其他人無咩分別，只不過佢工作係一名演員咁解，可能喺紅地毯上佢係一位大明星，但現實就同普通人無分別，每日都係食嘢瞓覺，都係只可以食一碗飯，無食到10碗飯呢啲特別技能。

梁朝偉愛睇傳記文學，特別係《挪威的森林》，而村上春樹喺《挪威的森林》中寫道：「沒有甚麼人喜歡孤獨，只是不勉強交朋友而已， 因為就算那樣做，也只有失望而已。 」其實獨處唔代表孤獨，就算身邊高朋滿座也可以感到孤獨。