肥仔@ERROR、強尼、黃劍文因《造星》而成好友！肥仔大爆與保錡當年被安排加入MIRROR？！

撰文：八卦妹｜圖片及影片來源：《Music Panda》截圖

強尼、肥仔@ERROR及黃劍文因《造星》而結成好友

今集ChillGOOD TV節目《Music Panda》邀請到ViuTV一哥強尼、肥仔@ERROR及黃劍文到場，與KB及黃丹儀一齊jam歌，節目上線當日就已吸引到逾十萬人觀看，認真利害。肥仔、劍文和強尼在節目中提到大家均是因為全民造星及加入ViuTV後認識成為朋友，並覺得人生乜都應該試一試，才參加全民造星。

肥仔@ERROR自爆當年參加《造星》全為一百萬

黃劍文表示自己決定參加《造星3》是因為疫情嚴重，覺得唔知會唔會死，所以就抱著點都要嘗試的心態而去參加唱歌比賽，看看自己是否真的可以再唱歌；至於，肥仔就笑稱自己好膚淺，全為一百萬獎金而來，覺得世界一定有人鐘意得得意意的肥仔，未必一定個個like姜濤這款，而強尼更不用說，放棄工程師高薪厚職追夢，成為Viu TV一哥主持。

肥仔@ERROR、強尼爆《造星1》在皇室堡的拉票盛況

在節目中，強尼、肥仔@ERROR及黃劍文除了一開場大唱《造星》主題曲《前傳》、《E先生連環不幸事件》、《LadyKilla》，仲大爆當年參加《造星1》時，最後十強在皇室堡的拉票盛況，強尼：「當時喺皇室堡喺台上見到台下滿滿燈牌，再加上尖叫聲不斷，搞到我全身都毛管戙」；而肥仔就大爆自己願意簽約ViuTV都是因為被皇室堡當天的情況而感動到。

隨後，肥仔就表示童年時媽媽帶他去Disco，所以自己就經常聽郭富城、黎明的快歌，直至長大後，才聽張學友，之後肥仔更即場清唱扮郭富城唱歌，而劍文就話自己鐘意sammi及學友。

肥仔@ERROR大爆曾與保錡被安排加入MIRROR

見到肥仔，當然少不免講到ERROR，肥仔表示當年曾收到通知是要與保錡一齊加入MIRROR，但後來看到與193的火花，所以就組成ERROR。之後，肥仔又提到：「大家可能覺得我係一個正經d的人，我係隊長冇咁好笑。」當丹儀及KB問他們四個有冇試過不和時，肥仔就笑說：「有呀！點會冇吵過架？都係錢作怪…哈哈哈，其實應該係數字作怪，保錡、193好緊張數字，咩都數字行先，見到收看率低就會覺得浪費時間，努力做完冇人睇，其實都係顯示我地好認真一面。」

強尼殺入樂壇同Mirror鬥?

眾所周知，強尼無論是演戲、主持，甚至唱歌都十分好，從而被網友冠上「全尼」之稱號，問到強尼有否想過加入樂壇與Mirror鬥時，強尼笑謂:「相信係因為我嘅身份唔係一個歌手，佢哋對我嘅要求唔會定得特別高，我唔敢講自己唱得好好，但係得到大家嘅讚美同埋喜歡，我係非常開心嘅。」

及後強尼語重心長表示，「以前覺得可以講波，做下主持已經大滿足，依家心態又不同了，比以前責任感再多了一些，以前做係唔知有幾多人睇，依家真係感受到好多朋友撐，好多人開始留意Viu TV節目，咁我地就要好努力，有責任去承擔做好每一次演出，保住香港電視文化呢一塊，廣東話節目，做番俾香港人睇。而唔係大家不停睇外國節目，感覺本土力量已經消失。我地要一直有廣東話歌，廣東話節目這個大使命同責任。」

周慧敏留言大讚　網友激讚：樂壇欠劍文、強尼一個交代

周慧敏在留言區內留言：「支持支持!!! 好鍾意三位唱《前傳》，特別有意思，聽到有點感動！ Music Panda 加油」，而一眾網友看完節目後，都紛紛激讚：「強尼把聲真心好正呀」、「劍文唱得好好，樂壇都欠劍文一個交代。」、「睇留言發現原來好多人真係唔知強尼本身唱歌出身」、「強尼真係好唱得,唔做歌手有D浪費」、「花姐可唔可以捧強尼，好想瘋狂聽佢唱歌」

圖片及影片來源：《Music Panda》