宣萱倒戈拍ViuTV劇 拍住ERROR放笑彈
孖黑仔演離婚夫妻
今次成功斟洽宣萱和姜皓文埋班的監製陳翹英,將開拍一部20集的港式喜劇,全劇於香港取景,劇情講述一名過氣江湖大佬金盆洗手從良,據知呢位江湖大佬由公認有戲的姜皓文飾演,而宣萱則為他的前妻,兩人2019年曾合作古天樂主演電影《犯罪現場》,不過當時對手戲唔多,今次合作新鮮感十足,而且黑仔無論公仔箱或大銀幕都十分入屋,又拎埋金像獎最佳男配角,絕對配得上前無綫一姐宣萱!
四子繼《男排女將》後再合體
劇集另一招徠點,莫過於Viu鬼馬男團ERROR都有份,一向MIRROR 12子幾乎包滲入Viu每部劇集,但由於今年7月底MIRROR演唱會發生嚴重意外,以致識生金蛋的MIRROR焗住停工兩個月,今次Viu開新劇,ERROR成功攝位,據知四子肥仔、阿Dee、193同保錡都有份參演,他們會變身姜皓文從良前的古惑仔手下,齊齊大放笑彈,今次是ERROR四子繼《男排女將》後再次合體拍劇。
宣萱搶灘成功
Viu一向挖人唔手軟,今年6月,邵美琪出席電影《被消失的凶案》首映禮時,久未露面的她坦言唔少工作都受疫情影響,自己又唔希望隔離太耐,所以希望留港工作,更即時問舉住Viu咪牌的記者:「你咩台,Viu喎,得閒搵我啦咁!」她笑謂希望拍喜劇,有睇過好友黃德斌演的《大叔的愛》後,都想跟年輕演員合作,更反問「依家係咪好興同MIRROR(合作)呀?」,然後她笑謂:「我反而想同ERROR喎,我覺得佢哋好搞笑喎,仲話同四子邊位合作都OK,據知,ViuTV方面亦有接洽過邵美琪,但最後落實人選為宣萱。
監製棄無綫跳槽
今次搵到宣萱和姜皓文埋班的監製兼編劇絕唔惹少,他近年比較為人熟悉的作品,是為無綫打開AI劇路線的陳翹英,他的代表作包括《楚留香》、《上海灘》、《香港八二》及《射鵰英雄傳》等,2019年曾與ViuTV合作、由影帝黃秋生參演的劇集《理想國》,去年則為無綫炮製了李佳芯主演的《智能愛人》,選角眼光獨到之餘,亦為無綫打開AI之路,連MyTVsuper宣傳都落重本用李佳芯AI角色,盛傳陳翹英本來有份監製由陳自瑤擔演女一的《選美的12夜》,但最後都決定離巢,棄無綫跳Viu。