子華神突發歌神上身 自彈自唱自嘲答謝影迷

耗盡精力博命宣傳

早前子華神和潘燦良完成50場主演的舞台劇《最後的禮物》，精力耗盡，但子華神旋即歸隊，為《飯戲攻心》宣傳謝票，票房走勢凌勵仲未停，戲中演員如鄧麗欣Stephy、張繼聰等已用自己的方式「找數」，最勁的當然要數Stephy呢位「找數女漢子」，一向昔肉如金的她，一連po了幾張大尺度泳照，答謝影迷支持！

自嘲「票房鶴頂紅」

日前黃子華表示：「我已做了18年票房毒藥，每次代表電影走出來，都唔想大家針對我呢方面，忽然有7,000萬的數字，同時令我諗起英國演員Ricky Gervais在頒獎禮上提醒演員，其實冇人緊張你，得獎只要講句多謝就可以走落台，所以我唔會太囂張，獲得7,000萬應該自己暗暗開心，大大聲多謝大家。」7,000萬代表了100萬名觀眾入場，子華覺得很實在，所以請市民搭巴士作謝禮，相隔數日，他在11月2日事先張揚會「找數」，至昨晚8號風球之夜突發兌現，親自撈埋曲詞、自彈自唱屬於他的《毒藥之歌》！

毒藥之歌 曲、詞：黃子華

從前有個藝人
佢好紅
係票房鶴頂紅
佢用一隻一蚊一隻雞 自斷米路好架勢

佢朋友冇普通人
唔係影帝就係電影嘅神
成日吹水拍戲 拍戲有幾激氣
我惟有收聲 為佢哋暗暗打氣

係翻身無望 保證冇票房
不麻煩人哋 自己會收起

我要紋身 紋晒整個人
咪叫我再拍戲 我主動唔玩拜拜你條尾

嗰陣時都算真係幾絕望
但係正如詩人話齋
絕望同希望一樣 都係虛妄
你都接受咗命運㗎啦 點解會忽然之間……
七千萬 七千萬 七千萬 七千萬 七千萬 七千萬 七千萬

不過你放心 我唔敢嚚
點解呀 因為 剎那光輝唔係永恆
呢套七千 下套要留神
一朝得志冇意思 打回原形話咁易

所以今日最希望
其實係要大家記住以下呢四隻字呀好緊要呀

毒舌大狀 毒舌大狀
重要嘅嘢講多次 毒舌大狀 毒舌大狀
希望出年順順利利 大家會入場睇呢齣戲

子華神耿耿於懷

自嘲做了「18年票房毒藥」，開番晒嘅子華神話：「應承咗大家，要同大家分享吓，都少有㗎、十幾廿年嘅票房毒藥，都係一個紀錄，但個問題係，講呢啲嘢，我覺得好尷尬，仲講咩？好似好自戀定自憐，好核突。」所以他以自彈自唱方式去唱出心底話，唱完他又話：「你哋搞清楚，我唔係王菀之張繼聰，搞呢段嘢係難過除褲好多㗎，唔好再叫我除褲！」然後順道宣傳來年他主演的新戲《毒舌大狀，》，影片一晚已破萬likes，網民大叫「唔除褲就回水啦」、「被演戲耽誤的歌手」、「我成日都睇番《一蚊雞保鑣》」等等支持子華神！

11萬票房的《一蚊雞保鑣》

當年子華神出山為無綫拍《My盛Lady》人人都覺得會勁收，但當時子華神謙厚表示一直想演好嘢俾觀眾睇，每次盡力做：「我試過拍《一蚊雞保鑣》，用咗好多心機，裏面有咁有趣嘅嘢，但最後仆街仆成咁！」2002年，子華神執導的《一蚊雞保鑣》只有11萬幾票房，自此被冠以「票房毒藥」之名，不過當然已洗脫污名已久！