大J被批跟足死敵Andy哥拍片 網民大數Unsub之3大原因
大J回塘？向Andy哥抄橋！？
大J同日本老婆前年尾移居日本，他剖白稱在港精神壓力大，擔心自己因言論惹上官非，故到較有自由的國家居住。自此大J拍片內容自然全是日本的生活體驗。有網民在討論區指「點睇大J當初又笑又鬧人，但依家係咁抄Andy哥？」隨即引起網民激烈討論。
大J笑Andy哥消費日本老婆，自己又…
網民不滿大J「當初成日寸Andy哥搵日本老婆拍片吸流量，但依家自己又係咁」、「但最重要係大J老婆喺啲片度係無所用」、「Andy哥拍日本睇樓片，大J又抄，仲要睇樓片人地都拍到爛晒先拍」、 「大J去到日本無朋友，只能癡住老婆同老婆啲屋企人，咁當初咪X人」、「之前X人哋拎老婆出嚟，依家回力鏢，再唔係就收地方旅遊局錢拍啲旅遊Vlog做打手」。
大J回塘 被Andy哥倒追？
有網民更指大J回塘，「兩個都係最開頭時睇，Andy哥靠同老婆拍片先上位，之後轉型，間中先有老婆，依家啲片題材幾好睇，多元化有進步」、「大J就擺明行番Andy哥條路，移民、買樓、起樓，晒老婆，最核突老婆生唔到，隻貓死都要拍片喊畀人睇」。有網民指大J擁百萬訂閱，而Andy哥只有約15萬，但約view數比例，其實Andy哥係成績比大J更好，「大J係百萬訂閱但一直停咗喺嗰度無郁過呢」。
網民更大數大J「死因」：
1.好悶
「大J啲片真係好悶，以前一直有睇，但去到日本嗰啲真係好悶，成日得佢一個講，老婆行行企企，無所用」。
2.大J小氣成日寸網民
「成日寸人又小器，每次人地問佢嘢佢就起槓」、「問親佢嘢佢都係寸到爆，高高在上，懶型咁」、「睇咗佢咁多年，佢靠19年彈起，上咗位就懶清高，扮高高在上，講親嘢都係寸人」。
3.大J獨家村無朋友
網民指：「佢成日一個人拍片無火花，喺香港得罪啲同圈人，去日本又無朋友，淨係癡住老婆同佢啲屋企人，但又撞唔出火花」、相比之下，「 Andy哥啲片多元化啲，又同Yan、Jason、Peter一齊拍，又會搵下嘉賓，有趣啲」。
網民反大讚Andy哥有進步，而大J卻回塘，「Andy樣衰但起碼夠真，但大J就虛偽到極，龍門任佢搬。咁大個人仲中二病」、「大J唯一有脫髮個優勢，建議佢植完脫，再搵另一間再植，幫大家比拼邊間好」。
