陳展鵬歌手夢再撻Q 抽起《唐人街》明谷王浩信做視帝

流行娛樂

廣告

陳展鵬兩年前自劇集《天命》後,至今就再無劇出街!雖然九個月大小豬比真係圓碌碌可愛到爆,不過法官大人冤枉呀,陳展鵬事業心仲好強,仲有個歌手夢未圓㗎!

撰文:東方新地 | 圖:東方新地| 編輯:K.P(原文刊於:東方新地

陳展鵬秘密簽唱片公司 靠《唐人街》圓歌手夢

兩年冇劇出街啫,其實陳展鵬冇停過開工拍劇,仲有《 超能使者 》、《 逆天奇案 》同《 唐人街 》三套劇排住隊等出街,當中嘅《 唐人街 》既是無綫重頭劇,亦係陳展鵬繼16年《 城寨英雄 》攞獎後,另一個再次衝擊視帝嘅黃金機會!據悉入行做過兩年寶麗金歌手嘅煎Pang,其實一早錄埋劇集主題曲兼拍埋 MV,仲喺五月秘密簽埋唱片公司,希望借此劇打頭陣,正式宣布重回樂壇再圓歌手夢。

明谷王浩信做視帝陳展鵬相信公司

原本打算重頭劇配合主題曲,順勢隆重宣布加盟新唱片公司嘅如意算盤,除咗被疫情打亂陣腳,真正程咬金竟然係王浩信!原來九月臨時變陣抽起《 唐人街 》改播《 C 奶特工 》,其後因為王浩信《 反黑路人甲 》反應超出預期,索性打蛇隨棍上安排佢主演嘅《 踩過界 II 》做台慶劇,呢一著明谷王浩信做視帝之舉,搞到冇劇上冇歌出嘅陳展鵬好似半退休一樣,畀人誤以為做咗住家公囉!就此有傳媒問煎Pang 回應,佢就話監製話有嘢未處理好臨時抽起,自己相信公司係公平喎!

有傳媒指陳展鵬堅嬲 網民挖當年追胡定欣事蹟

對於被臨時抽起劇集,有傳媒專訪指陳展鵬後表示煎Pang 嬲咗,雖然字裡行間其實冇講佢真係嬲,只係表示無奈,但就引起一眾網民興趣,亦趁機挖返當年佢追胡定欣炒新聞事件。其實唔少觀眾都對《唐人街》有興趣,主要原因係而家套套劇都係嚟嚟去去嗰幾個演員,你唔悶佢都厭啦,不過《唐人街》究竟幾時先播,就真係無人知啦。