周嘉儀單拖行中環無人認出 棄做幕前升呢上市公司董事

流行娛樂

廣告

周不時喺報紙見到個「中環我至靚」欄目,硬係唔多明,香港地明明遍地靚女,點解唔多見到。呢日行經中環港鐵,眼前突然一亮,白雪雪、腿長長、輕熟女長髮飄逸有氣質,睇真啲,原來係早年講新聞、近年轉行講股嘅前無綫主播周嘉儀!

撰文:辛娛樂|圖片:新傳媒

周嘉儀單拖行中環無人認出

唔講新聞轉行講股,前主播周嘉儀今時今日已經係金融公司高層,自然最常喺中環蒲頭。家陣身為上市公司董事同市場推廣高層,周嘉儀今時唔同往日,行色匆匆日理萬機咁款喎!雖然唔做幕前,不過做市場推廣同網紅一樣要keep住日日咁靚,一身白裙腳踏四寸豆零踭,周嘉儀喺港鐵人海中特別搶眼。

身為董事兼高層,自然日理萬機,全程撳住電話好繁忙。不過做女強人都唔係全天候機不離手嘅,留意番周嘉儀個人page,平時日日行政套裝儀態萬千嘅佢,早前就全副運動裝備上去咗參加慈善長跑,素顏運動look,一樣咁上鏡仲好fresh㖭!

36歲嘅周嘉儀04年於香港浸會大學新聞系畢業後,隨即加入無綫,05年更踏上新聞主播之路。可惜,2015年周嘉儀離開無綫,當時臨別最後一刻仲同觀眾講:「今日係我最後一次喺《香港早晨》同大家見面啦,多謝過去咁多年嚟嘅支持,祝你哋以後每朝都有個美好嘅早晨,再見」。

離開主播之路後,周嘉儀即加入興業證券市場拓展部,同時亦不時出席公開活動,而且聽講佢多咗個興趣,就係入馬場買馬,唔知大家有冇喺馬場賽馬日撞過佢呢?