Pocotee將自己嘅形象性格化身成佢筆下嘅Pocotee,正如佢幫我哋畫嘅開版相咁,插畫卡通一直都存在喺佢嘅生活入面,形影不離。

君如古仔都撐 Pocotee 畫電影插畫走紅

流行娛樂

廣告

「人冇夢想,同條鹹魚有咩分別?」

呢句《少林足球》嘅對白之所以成為經典,因為刺中好多成年人嘅要害,好多人出嚟做咗幾年嘢,就會被生活磨蝕,遠離夢想。嚟自馬來西亞嘅插畫師 Pocotee ,6年前開始將自己嘅插畫放上網,兩年間都做唔出成績,一度諗過放棄。
呢個時候佢遇到伯樂——經理人Dylan為佢打開電影卡通宣傳畫之路,作品慢慢更跨越國際,一躍成為馬來西亞著名插畫師,fb專頁「Pocotee & Friends」4年來累積超過84,400人liked。
佢格言係:「我畫嘅每一筆每一畫都係我嘅夢想。」堅持,令佢夢想成真。

text – Jessie photo – Jacy、由被訪者提供

大哥包起去北京
作為伯樂嘅Dylan笑笑口講:「我哋喺馬來西亞都係睇港產片長大,7、80年代嘅港產片,會搵畫師將主角卡通化做電影海報。我4年前機緣巧合識到 Pocotee ,覺得佢好有呢方面嘅潛質,就提議佢向呢方面發展,我重拍心口做佢經理人。最初我做好多資料搜集同慢慢儲fb page like,當去到3、4萬時,手上有籌碼就開始同電影公司傾,希望佢哋俾機會 Pocotee ,又會攞埋香港電影海報美術大師阮大勇嘅作品同佢哋開會。一開始佢哋都冇乜興趣㗎,但人心肉做,加上睇到facebook有好反應就慢慢改觀,所以堅持真係好緊要。」

Pocotee 本身觀察力好強,畫1個卡通人物肖像只需幾分鐘,但神髓同真人十足十。佢直言如果唔係Dylan建議,根本冇諗過呢個技能可以同電影結合。「我最難忘嘅經歷係有次受電影公司邀請,要畫幅成龍肖像畫,喺《警察故事2013》馬來西亞記者發布會上作為驚喜禮物送俾大哥,佢見到之後非常鍾意,當場就喺記者面前邀請我哋一行人去北京參加佢嘅60歲生日會,同埋到上海參加成龍博物館開幕典禮,機票住宿由佢全包。我冇諗過原來畫畫可以帶俾我咁難得嘅機會。」

見君如古天樂似發夢
呢幾年 Pocotee 嘅電影卡通作品名氣愈嚟愈大,愈嚟愈多人認識。「一開始主要幫馬來西亞電影發行商繪製宣傳品,而今年終於有香港電影公司覺得我嘅作品好生動同可愛,直接搵我合作,嗰套係《12金鴨》。我細細個入戲院睇《家有囍事》開始鍾意吳君如,其實喺馬來西亞已經幫電影公司畫過幾次佢嘅肖像,但都冇機會見到真人,嗰次嚟香港重見到佢再加另1位偶像古天樂,我即刻同佢哋影相,真係好似發緊夢咁!」
Pocotee 話,如果佢當初冇同Dylan合作,可能已放棄咗自己嘅創作之路,更加唔會見到偶像。「我當時覺得自己都冇嘢損失,點解唔把握機會咩都試下呢?今年年底應該會出版插畫書,同埋計劃推出周邊商品。早前同《微信》合作推出嘅 Pocotee 免費貼圖,下載次數3星期已有100萬,所以嚟緊都準備會有第2次合作,我有今日,都係因為堅持同不斷嘗試追尋夢想。」

 

內容延讀:

【5條問題即測!】你係邊個 SANRIO明星

週末要排 蛋黃哥點心 5個萌樣之練成

以畫代筆
Pocotee 而家事業算係順風順水,全因佢堅持唔放棄,佢3歲喺屋企已經攞住支筆畫傢俬同牆,阿媽當然激到彈起!「不過佢知我鍾意畫畫,就送我上興趣班,一步步學。平時會畫生日卡送俾朋友,上堂喺啲書上面二次創作,就連考試都會喺草稿紙上畫唔停。去旅行人哋會用文字記低經歷,而我就鍾意畫低每日遇到嘅特別事物,我嘅生活都離不開畫畫。」
基於對畫畫嘅癡情,所以 Pocotee 中學畢業就考入美術學院讀插畫,事實亦證明 Pocotee 好有天分,09年佢以第1優秀學生獎得主身分畢業。

內容延讀:

【5條問題即測!】你係邊個 SANRIO明星

週末要排 蛋黃哥點心 5個萌樣之練成

絕望遇伯樂
Pocotee 畢業後入到間唔錯嘅公司,幫啲動畫、電子遊戲同電影畫graphics同創作。「我有日突然好想有屬於自己嘅作品,於是就開始創作自己嘅漫畫,開設facebook專頁『 Pocotee House』,將作品擺上網分享。插畫主角 Pocotee 就係我自己嘅性格反映,大頭蝦、粗魯,兼且係我鍾意嘅紅色。」
Pocotee 話開始嗰陣,每增加1個like都會好開心。「但正職要OT,公餘先有時間做副業,而且所有嘢都要錢,所以好辛苦,身體、金錢方面都有好大問題,諗諗下就想暫時擺低自己嘅創作。」

世事如棋,當你絕望時機會就會突然出現。4年前佢本身打算參加埋最後1次藝術活動就暫別,佢重同咗隔籬展位嘅泰國朋友講,點知呢位泰國藝術家話識有位做marketing嘅馬來西亞朋友Dylan,咁啱又想轉幫藝術家做經理人,於是2人見面,更一拍即合。Dylan:「我喺 Pocotee 個展位度觀察咗一陣,發現佢畫畫好快,而且唔使起草稿,全部都一筆過好犀利,就咁唔再畫太可惜喇!呢4年合作都會有爭拗,可能係工作上嘅畫風或創作方向,不過都係啲小事,有時重會搵同事投票再決定添。」緣分同機會就係咁嘅一回事,之後佢哋就重新出發,開設專頁「 Pocotee & Friends」,往後嘅故事大家都知, Pocotee 一步步變身名氣電影插畫師。「其實成日講堅持好似好老土,但我堅信夢想呢樣嘢係唯一通往成功嘅元素,起碼我就親身印證咗。」

YOU MAY ALSO LIKE ...