《再見螢火蟲》上映30周年 網民過了20年才發現動畫海報暗藏玄機 ?

流行娛樂

廣告

曾執導日本經典動畫《再見螢火蟲》嘅動畫家高畑勳本月初因肺癌離世,享年82歲,適逢《再見螢火蟲》30周年,近日有台灣網民將動畫海報調光100倍,發現海報中暗藏咗一架B-29轟炸機,成為網上熱話,不過,其實細心一睇,就會發現《再見螢火蟲》日版海報中,一直都有嗰架飛機嘅剪影出現!

撰文:東方新地| 圖片來源:電影截圖、海報 | 編輯:乖乖隆地洞@central(原文刊於東方新地

《再見螢火蟲》上映30周年 動畫海報暗藏玄機?

《再見螢火蟲》原本係作家野坂昭如以二戰為題材寫成嘅小說,於1988年由吉卜力工作室的動畫高畑勳執導拍成動畫電影上演,講述14歲哥哥清太同4歲妹妹節子於戰爭中失去父母後,因冇法忍受喺親戚家中寄人籬下嘅生活而離家出走,生活喺防空洞中,先後不幸身亡嘅故事。

《再見螢火蟲》被視為反戰題材嘅動畫,近日有台灣網民將動畫海報調光100倍,發現海報夜空中暗藏咗一架B-29轟炸機,更指海報中嘅光點係燃燒彈嘅火光,係想表達出「戰火不斷」嘅訊息,有唔少網民對呢個發現大表震驚,認為破解咗海報中隱藏咗30年嘅玄機。

但其實日版海報中早就清晰見到呢架飛機嘅影子出現,相信台灣網民po出嘅海報,只係因為解像度太低,先會令機影變得矇矓!