晚吹｜伍詠薇擺阿姐款藐嘴狂寸練美娟 網民：佩服娟姐高EQ
伍詠薇首次亮相ViuTV接受練美娟訪問
伍詠薇亮相首集娟姐及當奴主持的《晚吹－讓我一次買個夠》，分享她購物之趣事，伍詠薇公開個人消費比例，住屋方面佔她最大消費，主持展開追問為何丈夫要她夾錢？伍詠薇不耐煩：「平時唔夾㗎，有時我畀下咁囉！」娟姐接住一句：「呢啲隨心啦！」伍詠薇隨即被撻著，更反了一個白眼：「呢啲係我嘅家事，唔關你哋事好無？關你哋咩事先？」當奴和娟姐被嚇到窒一窒，仍努力控制場面保持笑容打㘣場：「我哋唔講屋，開番開支！」
伍詠薇寸娟姐：唔好以為身材好過我！
其後伍詠薇分享有收藏睡衣習慣，家中有四百多套睡衣，有很多未穿過，更遺憾沒有穿過這些睡衣影寫真，大表可惜，娟姐即鼓勵：「唔可惜，你依家著番再影囉！」意指她外貌身形多年來都保養得宜，卻再次觸動伍姑娘神經，用背脊得住娟姐並面向當奴話：「我話你知，你唔好以為身材好過我，佢唔好以為身材好過我，就講埋啲咁嘅嘢。」娟姐火速澄清：「咩啫我梗係唔係啦，真係有心唔怕遲！」伍姑娘瞪大對眼望實娟姐，娟姐即時向當奴求救：「你講，你公道！」當奴即嘗試化解尷尬氣氛，扭耳仔扮小丑話：「對唔住，對唔住，我打份工㗎咋，我哋去下一個環節啦唔該！」兩女大笑，暫時令尷尬氣氛稍為緩和。
被伍詠薇半集背脊得住 練美娟笑到最後一秒
不過之後伍詠薇分享收藏睡衣之道及趣事，就全程用背脊得住娟姐，只望住當奴，從此無再望過娟姐的方向，娟姐努力提問以控制節目節奏，問伍姑娘有甚麼獨門方法去收藏睡衣？但伍姑娘不但無望佢一眼，更妹妹仔、阿女稱呼娟姐，兼夾用長輩教導口脗表示：「咪搵個膠袋包住囉，好似上鏈錶咁得閒拎出嚟，放啲臭丸落去，得閒又揈下佢，仲有如果啲臭丸唔好會搞到啲衫變黃㗎，你知唔知呀阿女，阿練美娟！」娟姐不敢多言只恭敬點頭以示受教。
伍詠薇吸嬲：以為自己老海鮮大晒！
節目播出街後引起很大迴響，觀眾及網民戥娟姐忍足成集唔抵，大讚她還展現高EQ繼續發揮主持及控制場面的功能，但對伍詠薇首次上ViuTV就擺阿姐功架大感討厭，瘋狂吸嬲，斥她乞人憎指數颷升！「嘉賓真係無品到一個點！」、「呢位伍小姐慣性咁嘅表現，咁唔化？係咪佢舊陣時嘅年代，興咁樣態度做人哋節目嘅嘉賓呢？」、「伍姑娘很不專業和冇基本禮貌，令到2位主持尷尬和難堪，亦令觀眾睇得不開心」、「以為自己友支嘢！以為自己老海鮮！」、「前輩就可以唔識尊重人？」網民大讚娟姐，「娟姐真係好專業，被人半集得住，但仲保持笑容繼續若無其事」、「佩服娟姐的氣量，其實娟姐有伍小姐後生時直腸直肚風格」、「另一個角度 喺娟姐身上睇到值得學習嘅地方」、「辛苦娟姐」等。
