七仙羽見工in譚仔姐姐！力讚自己：我把口甜過個湯底、食開七小辣

撰文：海月丨圖片：譚仔

七仙羽見工in譚仔姐姐

今次七仙羽七師傅去見工in譚仔姐姐，原來都係一個「局」！因為臨近母親節，譚仔雲南米線不單帶嚟10天限定滋味驚喜，更推出全新蟲草花雞卷米線，而且更搵嚟近期人氣一時無兩嘅七仙羽七師傅拍宣傳片。七師傅喺片中同譚仔分店經理菊姐進行見工面試，更以流利「譚仔姐姐話」對答，大放笑彈。

七仙羽七師傅拍：「我食嘢好講究，最愛係七小辣，先食四小辣，再加三小辣，加埋就七小辣。」

七仙羽為求面試成功，力讚自己優點：「我把口甜過你個湯底，實冧到唔少客人，最緊要食得開心姐。」最後更華麗轉身變身「譚仔姐姐」，用獨特口音介紹米線：「湯底好似你媽咪咁甜，蟲草花滋補養顏，食完包你哋似兩姊妹多過兩母女！」。

是次拍攝七師傅坦言非常滿意酬勞亦很享受：「因為我單純同善良形象先被睇中，成個拍攝過程好開心，我覺得自己合乎資格做『譚仔姐姐』，相信食客見到我都食得特別開心」。

曾在外國留學，取得碩士的七師傅，除了現職身心靈教學與電視節目主持工作外，同時又是暢銷小說作家、專欄作家，有中醫師資格和自然療法醫師資格等等，說到張張刀張張利，七師傅表示學海無涯，最愛唔同嘗試：「女人係善變，最愛嘗試，我喺外國生活咗一段長時間，性格比較直接，我唔覺得自己有搞笑天份，只係講嘢比較真比較直，越認真越專業做事，都會變成一個笑話或笑片。」更直言帶給大家歡樂是開心事，明白香港人壓力大：「令到香港人輕輕鬆鬆，不論鬧我又好，笑我都好，絕對冇問題，我以講得一口流利譚仔話而自豪」。

七仙羽見工in譚仔姐姐片段：

https://www.youtube.com/watch?v=xAdWaQMsWW4