Netflix日劇《金魚妻》｜人妻瘋狂出軌 劇情滲透出軌常態 徵兆逐樣數

近日Netflix日劇《金魚妻》成為大家熱討嘅話題，皆因題材敏感，爭議性大，令好多網民都開始探討當中「出軌」呢個議題。「出軌」雖已係老生常談，不過似終我哋生於一夫一妻制度嘅社會，呢個話題始終都仍然具備討論價值，而劇集當中其實淡淡滲透住普遍人出軌嘅唔同徵兆！

7個出軌徵兆

1.手機有古怪

手機係我哋跟身之物，簡直係我哋人類嘅好朋友，內裡一定隱藏住唔少秘密！有時睇人手機已經可以了解嗰個人好多嘢！《金魚妻》劇中，金魚妻嘅老公之所以發現金魚妻出軌金魚店小鮮肉都係因為佢手機嘅一張圖片！所以當你另一伴成日㩒手機，又收收埋埋，唔肯同你分享，咁就要小心啦！

2. 成日唔見人影、夜返屋企

如果一齊住或已婚人士，呢個徵兆就最明顯啦！成日假借好多唔同嘅理由出門，例如工作、約朋友等，早出晚歸。何況而家疫情，又無晚市堂食，仲邊有咁多地方好去呀？！《金魚妻》劇中出軌嘅妻子都對呢樣嘢好小心，睇住時間做人！

3. 講嘢勁暴躁、對你無晒耐性

有無試過問多2句都俾人鬧？然後又成日搵人同你比較，成日聽到「呀邊個邊個好啲」、「學吓邊個邊個」等等。真係有比較先有傷害，好自然將出軌對象同你比較，總會覺得你比出軌對象差，對你無晒耐性。呢種人通常因為將責任歸咎於你，覺得歸根究底因為你做得唔夠好，佢哋先會出軌。劇中金魚妻嘅老公都對佢非常暴躁，3句唔埋就想動粗。

4. 突然用心打扮、靚咗

伴侶比起平日更多咗打扮、貪靚咗，雖然都有機佢只係想稍為改變自己，但其實往往都係因為出軌令佢可以著重自己嘅外表，同埋因為要掩飾自己嘅謊言！劇中嘅頭痛妻出軌後都俾朋友讚佢靚咗，問佢係咪出軌！

5. 少咗性事、興致缺缺

出軌好多時都係肉體上嘅出軌多於精神，肉體上嘅滿足從而減少對你嘅性興奮，所以都會因為咁而減少性事、肢體接觸。劇中不少妻子都有呢個問題，指同老公已經好耐無性事，想要小朋友都成為一個大難題！

6.突然對你好好、買嘢送俾你

有啲出軌嘅人會因為心虛或是內疚會希望做啲去彌補你，令自己內心好過。所以如果另一伴突然無理由地對你好好，仲送好多嘢俾你，你想要咩就買咩，通常都係做錯事啦！劇中金魚妻老公偷食完後無啦啦準備大餐俾金魚妻。

當然以上嘅原因都係比較普遍，同埋都唔一定係啱，出軌仲有唔同嘅原因。亦有好多網民都話其實可以毫無徵兆！