韓國新世代樓王

韓流喺亞洲等地持續升溫,造就咗N咁多個掘金機會,識得賺嘅同時,亦都要識得錢搵錢先係王道,喺韓國演藝圈中,到底邊個先係樓王?日前韓國公布咗「20代藝人物業排行榜」中,首位竟然係現年27歲、近年被封為收視毒藥嘅張根碩;至於去年勁賺1.28億嘅嘅男神李敏鎬,手上就只得1幢2千萬嘅豪宅,睇嚟投資方面差少少喎!

text-phoebe

張根碩 早入行早吸金
5歲就以童星出道嘅張根碩,09年憑《原來是美男》爆紅,雖然近年作品喺韓國多以仆直收場,但無損佢喺日本嘅人氣,單係唱片、巡迴演唱會同廣告收入就已夠佢做樓王。除咗喺首爾持有1幢100億韓圜(約7,000萬港元)及40億韓圜(約2,800萬港元)別墅之外,張根碩喺東京亦持有1幢6層高、價值600億韓圜(約4.2億港元)嘅豪宅,而喺今年初,佢再次出手買入位於首爾江南區嘅1幢大廈,市值為213億韓圜(約1.5億港元),手上物業加埋近7億港元,令佢成為眾20代韓星之首。

Kara 女星血汗錢
女團Kara 2010年因歌曲〈Mr〉而喺日本走紅,唱片以及DVD銷售量曾高達180億韓圜(約1.2億港元),受迎歡迎程度甚至遠超少女時代,表面上收入可觀,不過,由於當時日本經理人公司抽取8成半佣金,令Kara 5位成員實際收入約為1億韓圜(約70萬港元)。不過,經過連番指控以及重新簽約後,成員之一嘅勝妍去年終於有足夠財力喺首爾清潭洞買入1幢45億韓圜(約3,000萬港元)嘅4層高大廈,成為20代樓王之中亞軍,兼且係唯一上榜嘅女藝人。

金秀賢 連環出手
因《來自星星的你》紅到發紫嘅金秀賢,去年初以40億韓圜(約2,800萬港元)買入聖水洞Galleria Foret豪宅,同G-Dragon做鄰居,同年,佢向銀行貸款16億韓圜(約1,100萬港元)買下距離聖水洞20分鐘路程、鄰近首爾林(公園)嘅Hillstate公寓俾媽咪住。至於另一位男神李敏鎬,雖然其事務所去年錄得1.5億港元業績,比前年增加231.7%,純利逾900萬港元,但男神手上只係持有1個位於論硯洞、市值30億韓圜(約2,100萬港元)嘅單位,少咗啲喎!

 

YOU MAY ALSO LIKE ...

There are 2 comments

Add yours

Comments are closed.