面懵心精甜筒輝 轉型YouTuber

面懵心精甜筒輝 轉型YouTuber

講鄭文輝呢個名,你可能唔知係邊個,咁甜筒輝呢?「哦,《喜劇之王》嗰個傻仔收數佬嘛!」冇錯,佢就係人稱輝哥或甜筒輝嘅鄭文輝。

佢曾經係星爺御用綠葉王,亦係《食神》、《行運一條龍》、《喜劇之王》嘅場記、編劇及副導演。因為天生個樣「XX懵懵食甜筒」,佢被《十兄弟》嘅副導演起咗個花名甜筒輝,到《食神》時,星爺重將佢由幕後帶到幕前。

上年輝哥加入網絡媒體,做埋YouTuber,重喺YouTuber新秀比賽「香港最強CREATOR新秀戰2014」中奪得第5名。「我個樣懵啫,但我都知道,媒體急劇轉型,乜都要上網㗎啦!」輝哥邊說邊笑,笑得實在很——傻。

text – Jessie photo – Jacy、由被訪者提供

opening

《喜劇之王》中輝哥係跟星爺學演技去收陀地嘅港大畢業生,今次開版相專登模仿番當時嘅造型。咦!輝哥好似肥咗啲喎,食得多甜筒乎?
《喜劇之王》中輝哥係跟星爺學演技去收陀地嘅港大畢業生,今次開版相專登模仿番當時嘅造型。咦!輝哥好似肥咗啲喎,食得多甜筒乎?

甜筒輝YouTube Channel:
https://www.youtube.com/user/timtonfai2014/videos

 

鍾意玩如花

得罪講句,輝哥笑同唔笑,個樣都十分之懵。跟出名鍾意整蠱人嘅星爺做嘢,會唔會被佢玩到反轉?

輝哥話星爺喺現實都係「整蠱之王」。「同佢共事幾部電影都有被整蠱。好似《食神》度橋寫劇本嗰幾個月,周生(星爺班底嘅叫法)每晚都會拉隊食飯兼落酒吧飲嘢。佢知我唔識飲酒,有次就同酒保夾定,喺我杯橙汁加烈酒,我飲咗兩啖就wing wing哋,最後重瞓着咗。

「另1次就係再早期啲,李力持第1次帶我去探《大內密探零零發》班,周生同班crew啱啱食完消夜,重有碗魚蛋粉剩就俾我食。嗰次係第1次見周生,佢竟然叫我喺佢面前食晒碗魚蛋粉,俾我對筷子重要係攣嘅,勁難用,佢見到我嘅狼狽樣,就全程牛咁眼望住我。我緊張到不得了,對手震住咁食。佢見我愈緊張,就『啤』得重『行』,結果我對手愈嚟愈震,好辛苦先食晒碗粉。不過其實佢同我合作一段時間後,都知我係好拘謹嘅人,唔多玩得,而就算玩,我亦唔會出現乜嘢爆笑效果,所以佢都係鍾意玩『如花』李健仁多啲。」

 

被星爺鬧粉腸

當初輝哥一直都做幕後,直到拍《食神》最初都係,但有日星爺突然問佢屋企有冇西裝,叫佢第2日着返工,原來星爺睇中佢個樣夠懵,叫佢客串雙碩士學位傻仔嘅角色。「我前1日先知道要演戲,於是就度咗段對白俾自己,詳細唔記得,總之係用嚟形容個杯麵。我睇人演戲就睇得多,但到自己出鏡時,先知自己好鬼怯場,口窒窒講唔到對白。周生當時有少少火,話:『你條粉腸,自己度嘅對白都講唔掂!』跟住走開一陣,返嚟就話唔好講嗰拃對白喇!原來佢度過啲新嘢我講:『美美美國哈佛大學、英國劍劍劍橋大學』,呢句就係其中周生即場度俾我嘅對白。佢話你條友仔口吃吖嘛!我就俾你演個口窒窒嘅角色,實好自然啦!」

輝哥重話星爺轉數超快,每場戲嘅細節,佢都係幾日前先詳細咁諗,甚至現場再諗,重會經常加減戲中小角色。「佢成日諗身邊除咗正規演員,重有咩人可以加落套戲度。《食神》入面咪有場成班人排開輪流講『不如溝埋嚟做瀨尿牛丸吖笨』嘅?其實有部分都係劇組啲人嚟。」

照片攝於俞琤(後左2)屋企,當時星爺同佢商討緊同商業電台合辦「喜劇之王訓練班」,李思捷同埋林子善就係因為參加咗呢個活動而獲得機會參演《喜劇之王》。
照片攝於俞琤(後左2)屋企,當時星爺同佢商討緊同商業電台合辦「喜劇之王訓練班」,李思捷同埋林子善就係因為參加咗呢個活動而獲得機會參演《喜劇之王》。

傳授喜劇心得

跟喺星爺呢種轉數咁快嘅人身邊,每秒都要提高警覺,輝哥就試過爭啲出事。「《食神》有場戲講一群有厭食症嘅人衝入鋪狂食瀨尿牛丸,我當時係副導演,要負責搵批好瘦嘅臨記,但臨記公司搵嚟嘅都唔夠瘦。星爺見到呢班cast,本來準備發火,好在如花發現呢件事,即時喺拍攝現場附近搵咗啲道友,俾每人2、300蚊嚟頂替,好彩最後都被佢搵到幾個好瘦嘅,最後我先逃過一劫。」

不過輝哥話同星爺做嘢,真係可以學到好多嘢。「拍《食神》時,星爺突然有日私底下教咗我一啲喜劇處理嘅秘訣,喺呢度當然唔可以公開啦!雖然出面話佢好刻薄,但佢對我算係咁,合作期間冇乜鬧過我,重幾客氣。其實我覺得佢只係比較自我,我都係呢種人,好理解佢,所以我更識睇佢眉頭眼額,知道幾時可以同佢講嘢,幾時唔適合。後來《少林足球》上映,佢搵有線電視幫手做宣傳,我嗰時喺有線度做,見番面都有講有笑。」

李力持
李力持

李力持:「阿輝抵得諗!」

輝哥師傅李力持,話當初揀咗輝哥,係因為佢唔怕蝕底。「好多時新人一入行就會問我可以搵到幾多錢,成日希望一步登天,不過阿輝就唔會計較呢啲嘢,大學畢業放棄銀行高薪厚職入電影圈,可以睇得出佢好有決心。而且佢好勤力又肯接受挑戰,喺佢跟我嗰幾年入面,都冇被我哋趕走,就證明佢真係好捱得同埋好抵得諗。拍《喜劇之王》,要佢做收陀地嗰段戲,其實都幾艱辛,要被摑之餘,因為我同周星馳要求都好嚴,通常我或星爺會親自示範,演員嘅動作同語氣都要跟番,對冇乜演戲經驗嘅佢嚟講,能夠完成到都算幾好喇!」

輝哥到目前為止,客串過十幾部電影,最令人印象深刻一定係呢幾部——1996年《食神》口窒窒雙碩士畢業生、1998年《行運一條龍》鍾意SM外賣仔、1999年《喜劇之王》收陀地傻仔。
輝哥到目前為止,客串過十幾部電影,最令人印象深刻一定係呢幾部——1996年《食神》口窒窒雙碩士畢業生、1998年《行運一條龍》鍾意SM外賣仔、1999年《喜劇之王》收陀地傻仔。

低B樣高才生

輝哥天生懵樣,真係估佢唔到原來係個高才生,A-level有1A2B,重入埋港大,畢業後就被大銀行請咗。不過佢話見到啲同業前輩日日返工放工咁悶,覺得唔對路。「我想做電影編劇,就報讀永勝電影公司編劇訓練班,當時向華勝自己、王晶、陳可辛、陳嘉上都有嚟教書。」

訓練班畢業之後,李力持喺全班30幾人入面揀咗輝哥跟佢學做編劇。「我估係因為當時電腦未普及,但我喺銀行工作時已熟用,所以我係少有打字寫劇本嘅人,重會加少少graphics,出嚟嘅嘢較為清晰,所以先吸引到李力持。」輝哥第1套戲係喺上海拍嘅《十兄弟》,當時佢做場記。「嗰時試過成班幕後夾埋叫徐錦江嚟呃我去佢間房,然後徐同我講:『小朋友啱啱入行,有啲嘢係要付出嘅。』意指要我同佢發生關係,我當時驚到爆,即刻衝咗出房,見到大家喺晒出面,先知原來係整蠱緊我。

「返到香港之後,星爺拍緊谷德昭嘅《大內密探零零發》,李力持帶我去探班,順便介紹星爺俾我識。嗰套戲之後,星爺自己開公司,準備開拍《食神》,李力持擔正做導演,因為我跟開佢,所以就順勢安排我入去做場記、副導演同編劇,嗰刻就正式參與星爺啲戲。」

輝哥(上排最左)話最初離開銀行工作轉入電影圈,收入好唔穩定,譬如《食神》劇本度咗3個月,咁就3個月都冇人工。所以佢父母有段時間唔使佢俾家用,啲錢只係用嚟供樓同埋自己用,嗰時都幾拮据。不過之後證明一切都係值得嘅。照片攝於《食神》慶功宴上。
輝哥(上排最左)話最初離開銀行工作轉入電影圈,收入好唔穩定,譬如《食神》劇本度咗3個月,咁就3個月都冇人工。所以佢父母有段時間唔使佢俾家用,啲錢只係用嚟供樓同埋自己用,嗰時都幾拮据。不過之後證明一切都係值得嘅。照片攝於《食神》慶功宴上。

創業失敗崩潰

同星爺合作至《喜劇之王》尾聲時,輝哥經谷德昭介紹,去咗有線做動畫《衰仔樂園》粵語配音版嘅創作總監,之後重身兼報紙副刊編輯。「當時兼任兩份工,根本已經唔夠時間用,所以推咗好多電影嘅邀約,本來星爺都有叫我客串《少林足球》,但工作正喺搏殺期,所以婉拒咗,之後其實都有啲後悔。」

日頭夜晚打兩份工嘅時間維持咗3年,佢跟住再跳去少年雜誌《TEENS》做搞笑漫畫編劇。「當時由漫畫《Miss Sex》嘅漫畫家李勉之繪畫,漫畫頭兩期單行本都大賣,所以個心好雄,覺得自己可以自立門戶,就同幾個朋友一齊自資出咗本叫《Punch》嘅漫畫雜誌。但嗰時年少氣盛又冇經驗,結果一敗塗地,崩潰咗成個月,日日都足不出戶,要屋企人照顧。」

輝哥所拍嘅YouTube片以搞笑為主,全部都係自己拍自己剪埋。但之前完全唔識剪,都係因為做網媒時工作要學,所以可以話係呢份工訓練咗佢成為1個YouTuber。
輝哥所拍嘅YouTube片以搞笑為主,全部都係自己拍自己剪埋。但之前完全唔識剪,都係因為做網媒時工作要學,所以可以話係呢份工訓練咗佢成為1個YouTuber。

轉做YouTuber

輝哥振作番之後,就同另1出版社合作出《爆笑王》漫畫,一做10年,其中6年長駐深圳。但囡囡13年要返港讀幼稚園,所以回流返港,近年紙媒沒落,盈利不停下降,輝哥話要諗計轉型。上年佢就加入1間網絡媒體做編輯,同時亦開始拍片放上YouTube。「做呢份工之前,我完全唔識咩係YouTube。返工嘅第1日,同事就同我講一定要摸清楚YouTube呢樣嘢。當我開始了解呢個平台,發現比電影互動好多,因為可以留comment,直接知道觀眾反應。我就拍咗第1條片《跆拳少女打傻賊》放上去,之後重參加『香港最強CREATOR新秀戰2014』,最終得到第5名。」

輝哥話以前覺得電影最高高在上,對其他媒介完全不屑一顧。但而家發現YouTube效果更強,拍咩都得,可以好「任性」咁做實驗試反應。「我而家都重係摸索緊短片嘅節奏,同點先最能迎合大眾口味。我做YouTuber其實都係train緊自己編與導嘅能力,最終目標始終係電影。」

輝哥做漫畫雜誌時認識到「Eggrolls」畫室嘅人,當佢想做YouTuber時,就開始同佢哋師生合作。「而家亦有唔少冇經驗但又想拍片嘅中學生inbox我,表示想同我crossover,我都有應佢哋要求,一齊拍片玩下。」
輝哥做漫畫雜誌時認識到「Eggrolls」畫室嘅人,當佢想做YouTuber時,就開始同佢哋師生合作。「而家亦有唔少冇經驗但又想拍片嘅中學生inbox我,表示想同我crossover,我都有應佢哋要求,一齊拍片玩下。」

今年將有輝哥參演嘅作品上映,如曾志偉監製嘅《吉星高照2015》,另外兩套係由谷德昭執導、鄭中基主演嘅《惡人谷》,同埋由黃子華、鄭中基、陳法拉主演,講述張保仔嘅《神秘寶藏》。
今年將有輝哥參演嘅作品上映,如曾志偉監製嘅《吉星高照2015》,另外兩套係由谷德昭執導、鄭中基主演嘅《惡人谷》,同埋由黃子華、鄭中基、陳法拉主演,講述張保仔嘅《神秘寶藏》。

預告片:

http://www.youtube.com/watch?v=lkXtLjLW4ac

YOU MAY ALSO LIKE ...