陳柏宇一家三口年頭搬大屋 符曉薇拍片介紹兼爆Jason怪癖

陳柏宇 同老婆符曉薇結婚3年並育有2歲囡囡Abigail,囡囡漸漸成長,屋企要添置嘅傢俬同玩具就愈嚟愈多。由於計劃將來喺加拿大置業,所以選擇在港租樓暫住先,年頭佢哋一家三口就搬到九龍區豪宅,不過租屋都一樣可以住得豪華,兩公婆就比較有要求,新居髹過晒啲牆、訂造大部分傢俬、網上訂購精緻小玩意同擺設,就算租都要住得啱心水啊嘛!

撰文、圖片:東方新地 |編輯:Evita(原文刊於:東方新地

陳柏宇被老婆爆怪癖

早前陳太符曉薇就拍片介紹新租住嘅九龍區豪宅,長達廿幾分鐘每間房每個角落每件傢俬陳設都詳細介紹原因來歷,house tour期間仲有兩歲囡囡 Abi 全程搞搞震,吵吵鬧鬧之間都爆咗好多男主人獨一無二嘅怪癖!

話說陳家有四房二廳三個廁所,兩個套房前後四個露台,陳生有主人房唔住,揀咗間仲細過工人房淨係擺得落雙人床嘅細房嚟瞓,原因係「 有套廁影響睡眠質素 」,同埋「 入房只可以瞓覺,唔想一個瞓緊覺、一個就起身整嘢嘈到另一半 」喎!窩心又有諗頭,最緊要出大份錢嘅陳柏宇原來仲有啲設計天份,老婆梳妝枱、工人高架床仲有門口雜物櫃,都係陳生親自畫圖特別訂造,而每間房都有主題顏色,連工人房都髹咗姐姐最鍾意嘅粉紅色,呢啲咁好嘅僱主去邊度搵?仲有呀,雖然老公搵到錢,但老婆符曉薇都精打細算識慳錢,大方向大傢俬陳柏宇話事,小飾物櫃、囡囡房護墊就係陳太淘寶番嚟,呢啲咪配合得天衣無縫囉!

YOU MAY ALSO LIKE ...