鄧兆尊

鄧兆尊爆ViuTV內部溝通差:管理層要做啲嘢﹗ 揭曾被某台撳住搶錢

流行娛樂

廣告

ViuTV 近年綜藝節目口碑超越無綫,製作選秀真人騷《全民造星》更成功打造出MIRROR、ERROR及COLLAR﹗重重打擊無綫地位,急召曾志偉回巢任高層進行大改革﹗無約在身又走勻兩台的鄧兆尊,近日大爆電視台秘聞,原來某台比大台更識諗縮數﹗

鄧兆尊評無綫唔公布收視:唔方便輸畀小朋友

鄧兆尊日前擔任貴花田及曾志豪的《田祖豪3寶》YouTube頻道嘉賓,對網民的Q&A有問必答,更大爆電視台秘聞,對於近日無綫忽然唔再公布其他台收視,鄧兆尊就咁答:「其實好多細節都睇到嘅,好似啱啱金像獎都有唔少TVB人去,大家都冇嘢,相信係幕後高層傾咗偈,只係表面唔講出嚟者,其實都係良性競爭,我都等緊MIRROR上《獎門人》﹗(曾志豪:係咪知自己大勢已去,所以唔公布收視?)獎門人親自出馬吖嘛,好就話啫,追唔返收視就唔好意思啦,但依家點都追唔返以前嘅收視啦,唔方便輸畀啲細嘅小朋友,係咪先?」

鄧兆尊 鄧兆尊近日為《田祖豪3寶》擔任客席主持兼嘉賓,今次大爆電視台秘聞﹗
鄧兆尊近日為《田祖豪3寶》擔任客席主持兼嘉賓,今次大爆電視台秘聞﹗(圖片來源:YouTube@《田祖豪3寶》截圖)
鄧兆尊 《獎門人》系列欣逢踏入 25 周年,全新一輯《開心無敵獎門人》回歸,「獎門人」曾志偉帶領「元祖獎老」錢嘉樂、阮兆祥,以及「新獎老」麥美恩、程浩駿、吳嘉儀擔任主持。
《獎門人》踏入 25 周年,全新一輯《開心無敵獎門人》回歸,曾志偉帶領「元祖獎老」錢嘉樂、阮兆祥,以及「新獎老」麥美恩、程浩駿、吳嘉儀擔任主持。(圖片來源:TVB)

鄧兆尊驚訝ViuTV收音師惡過導演、要嘉賓呆等兩個鐘

無綫出身的鄧兆尊,早已無約在身,近年先後上過ViuTV及開電視節目做嘉賓,對於近年發圍的ViuTV,鄧兆尊就有啲嘢想講:「大台始終幾唔好都好,內部管理得好好,好似啱啱返去拍修哥大壽個騷,五、六部一齊拍,啲嘢好快﹗但另一個台我去拍嘢,有次個導演同個收音師話個咪唔得想換另一個,個收音師竟然答:『咁我入倉攞﹗』,點知個導演聽完就話『咁唔使喇﹗』咁都得?仲有佢哋約你幾點,例如約我六點到,點知去到話大家要放飯,我坐咗兩個鐘等佢,我冇所謂,但呢啲就係佢內部溝通好有問題,管理層要做啲嘢﹗」

鄧兆尊
(圖片來源:YouTube@《田祖豪3寶》截圖)

遭拖糧40日:我真係咁多年未試過

主持貴花田好驚訝,鄧兆尊話呢啲小事,因為試過更誇張:「我過往每次做完嘢就會畀單簽就出糧,我去某一個台,我唔講邊間啦,佢問我攞invoice,攞晒名、身份證、銀行資料之後,話要遞上會計等批,話要三至六十日先出到錢畀我,我咁多年真係未試過,我去係幫朋友,啲錢少到出一出街就用完,仲少過港台你哋諗吓係幾少錢,但都拖咗四十日﹗錢銀真係唔係問題,只係希望佢做好啲,唔好令人覺得委屈﹗」

鄧兆尊 鄧兆尊日前和達哥一起擔任ViuTV《拆你個夢》嘉賓﹗
鄧兆尊日前和達哥一起擔任ViuTV《拆你個夢》嘉賓﹗(圖片來源:FB@杜如風)
鄧兆尊 2020年鄧兆尊為林曉峰主持的ViuTV節目《調查男女》擔任嘉賓,當時鄧兆尊話去撐兄弟林曉峰。
2020年鄧兆尊為林曉峰主持的ViuTV節目《調查男女》擔任嘉賓,當時鄧兆尊話去撐兄弟林曉峰。(圖片來源:ViuTV)
鄧兆尊 鄧兆尊曾上開電視《開運秘笈》擔任嘉賓﹗
鄧兆尊曾上開電視《開運秘笈》擔任嘉賓﹗(圖片來源:《開運秘笈》截圖)

鄧兆尊爆被當水魚開工要派錢

鄧兆尊愈爆愈多電視台秘聞,他指有一單真係過火又荒謬的事,但卻是百分百真實的事,佢話:「過年時有一個台搵我,話過年想帶歡樂畀大家,叫我突擊去幾間食肆派利是畀食客,我話好呀,但啲利是係我出喎,仲要我請埋全組食開工飯,講到明三圍左右﹗」鄧兆尊覺得不受尊重兼過晒火反要求邀請記者到場採訪:「我話你個台咁先進,真係要畀其他電視台學吓嘢﹗」貴花田即笑指原來無綫經典「無言感激」利是已算待遇不錯,鄧兆尊笑住回應:「至少係一種祝福﹗」

鄧兆尊 鄧兆尊曾在同一節目爆過大鑊,指從幕後人士中收到風,原來王祖藍北上的原因是因為不滿C君擔任TVB高層。
鄧兆尊曾在同一節目爆過大鑊,指從幕後人士中收到風,原來王祖藍北上的原因是因為不滿C君擔任TVB高層。(圖片來源:YouTube@《田祖豪3寶》截圖)

爆大台人工$2,500

爆完細台,再爆大台,對於外界對大台的長約好感興趣,鄧兆尊指過往無綫的經理人長約,有四款合作形式,他笑指大台認為他是新馬師曾個仔,相信加入電視台只為學嘢,所以將兩份高薪合約拎走,鄧兆尊指最後因為唔想被合約綁住七年,選擇簽一個月五個騷,每個騷只有五百蚊的合約,即月薪只有二千五百蚊,鄧兆尊話:「真係油錢都唔夠畀﹗」鄧兆尊爆料,引起網上熱討,留言「大家唔好再吹奏呢個台啦﹗」、「呢間無良企業就係成日諗呢啲縮數,搞到大頭佛出嚟,一鋪清袋」、「有比TVB更衰嘅台﹗」等﹗

鄧兆尊
(圖片來源:LIHKG 討論區截圖)
鄧兆尊
(圖片來源:LIHKG 討論區截圖)
鄧兆尊
(圖片來源:LIHKG 討論區截圖)
鄧兆尊
(圖片來源:LIHKG 討論區截圖)
鄧兆尊
(圖片來源:LIHKG 討論區截圖)

圖片來源:YouTube@《田祖豪3寶》截圖

YOU MAY ALSO LIKE ...