唔係劇迷都要識!盤點火辣美劇《權力遊戲》5大索女

超火熱美劇《Game of Thrones》(權力遊戲)不經不覺都已經來到最後一季!之不過為了不要防礙大家追劇(即不劇透),所以今次就同大家解構劇中5大索女,即使你唔係粉絲,有靚女唔係唔睇啊?
撰文:Emily|圖片來源:YouTube|編輯:異種火星人

1.Daenerys Targaryen (Emilia Clarke飾)

正所謂「得龍者得天下」,身為3龍之母嘅Daenerys Targaryen,一早已經征服咗劇迷嘅心。英國女星Emilia Clarke更憑此角彈起,即使佢演技麻麻,但只要靚女又敢露,上位做女神話咁易!

嚟緊Emilia Clarke重會喺萬眾期待嘅電影《未來戰士:創世智能》中擔正,飾演Sarah Conner呢個傳奇角色,前途冇可限量!

2.Margaery Tyrell (Natalie Dormer飾)

憑住佢驕人嘅身材、嫵媚嘅眼神,再加上識得掌握男人心,King Joffrey同King Tommen都先後被佢迷到暈陀陀。 唔係講笑,筆者身為女人,都爭啲招架唔住。

 

飾演Queen Margaery嘅Natalie Dormer,最為人熟悉嘅角色,應該係英劇《The Tudors》入面嘅Anne Boleyn,佢喺劇中嘅裸露鏡頭多到你唔想睇。

比較近期嘅就有《飢餓遊戲:自由幻夢 Part 1》入面嘅skin head女戰士,個頭搞到咁,爭啲唔認得佢。

 

3. Missandei (Nathalie Emmanuel飾)

係咪覺得佢好熟口面呢?冇錯喇,佢就係《狂野時速7》入面嗰位索爆女駭客Ramsey!其實佢着古裝一樣咁索。雖然佢喺《Game of Thrones》只係做Daenerys Targaryen嘅妹仔,但因為樣靚身材正,加上角色善良又忠心,成功成為最討好嘅角色之一。

 

睇過《狂野時速7》,都應該會對佢留下深刻印象,尤其沙灘呢一幕,睇到啲觀眾個個熱血沸騰。

 

4. Sansa Stark (Sophie Turner飾)

無論係劇內定劇外,佢都係天生一副美人胚子,尤其喺佢父母、哥哥同阿嫂都好慘烈咁死晒之後,更加覺得佢散發住1種惹人憐愛嘅氣質。啱啱播出嗰集,重講佢被變態新婚老公Ramsay Bolton強姦,真係好想攬住佢呵番。

飾演Sansa嘅Sophie Turner雖然演出經驗唔多,但就已經被荷李活《變種特攻》系列導演Bryan Singer睇中,將會喺出年上映嘅《變種特攻:啟示錄》中飾演後生版嘅Jean,絕對值得留意!

 

 

5.Melisandre (Carice van Houten飾)

Melisandre呢位女巫,雖然已經上咗年紀,但火辣程度一啲都唔輸俾後生女。除咗角色夠神秘之餘,打扮亦極之妖豔,重經常毫不畏懼咁喺鏡頭前3點盡露,連Jon Snow都爭啲抵擋唔住佢嘅誘惑。

呢位咁性感又專業嘅演員,係嚟自荷蘭嘅著名女星Carice van Houten,除咗係演員,重係1位歌手,不過因為多數喺荷李活電影都係做閒角,所以大家係唔太熟悉佢。筆者比較有印象嘅,就係佢喺08年嘅《華爾基利暗殺行動》中,飾演Tom Cruise個老婆喇!


YOU MAY ALSO LIKE ...

There is 1 comment

Add yours
  1. 新Monday / 你頂得順嗎?10級冧爆韓式情侶裝 - 新Monday

    […] >係咪劇迷都要知!《Game of Thrones》5大上位索女 […]


Comments are closed.